سر گزشت آدم

سُنے کوئی مِری غربت کی داستاں مجھ سے

بھُلایا قصّۂ پیمانِ اوّلیں میں نے

لگی نہ میری طبیعت ریاضِ جنّت میں

پیا شعُور کا جب جامِ آتشیں میں نے

رہی حقیقتِ عالم کی جُستجو مجھ کو

دِکھایا اوجِ خیالِ فلک نشیں میں نے

مِلا مزاج تغیّر پسند کچھ ایسا

کِیا قرار نہ زیرِ فلک کہیں میں نے

نکالا کعبے سے پتھّر کی مورتوں کو کبھی

کبھی بُتوں کو بنایا حرم نشیں میں نے

کبھی میں ذوقِ تکلّم میں طور پر پہنچا

چھُپایا نورِ ازل زیرِ آستیں میں نے

کبھی صلیب پہ اپنوں نے مجھ کو لٹکایا

کِیا فلک کو سفر، چھوڑ کر زمیں میں نے

کبھی میں غارِ حرا میں چھُپا رہا برسوں

دیا جہاں کو کبھی جامِ آخریں میں نے

سُنایا ہند میں آ کر سرودِ ربّانی

پسند کی کبھی یُوناں کی سر زمیں میں نے

دیارِ ہند نے جس دم مری صدا نہ سُنی

بسایا خطّۂ جاپان و مُلکِ چیں میں نے

بنایا ذرّوں کی ترکیب سے کبھی عالم

خلافِ معنیِ تعلیمِ اہلِ دیں میں نے

لہُو سے لال کیا سینکڑوں زمینوں کو

جہاں میں چھیڑ کے پیکارِ عقل و دیں میں نے

سمجھ میں آئی حقیقت نہ جب ستاروں کی

اسی خیال میں راتیں گزار دیں میں نے

ڈرا سکِیں نہ کلیسا کی مجھ کو تلواریں

سِکھایا مسئلۂ گردشِ زمیں میں نے

کشش کا راز ہوَیدا کِیا زمانے پر

لگا کے آئنۂ عقلِ دُور بیں میں نے

کِیا اسیر شعاعوں کو، برقِ مُضطر کو

بنادی غیرتِ جنّت یہ سرزمیں میں نے

مگر خبر نہ مِلی آہ! رازِ ہستی کی

کِیا خرد سے جہاں کو تہِ نگیں میں نے

ہُوئی جو چشمِ مظاہر پرست وا آخر

تو پایا خانۂ دل میں اُسے مکیں میں نے

sune koi miri ghurbat ki dastan mujh se

bhulaya qissa-e-paiman-e-awwalin main ne

lagi na meri tabiat riyaz-e-jannat mein

piya shuur ka jab jam-e-atishin main ne

rahi haqiqat-e-alam ki justuju mujh ko

dikhaya auj-e-khayal-e-falak nashin main ne

mila mizaj taghayyur pasand kuchh aisa

kiya qarar na zer-e-falak kahin main ne

nikala kaabe se patthar ki muraton ko kabhi

kabhi buton ko banaya haram nashin main ne

kabhi main zauq-e-takallum mein tur par pahuncha

chhupaya nur-e-azal zer-e-astin main ne

kabhi salib pe apnon ne mujh ko latkaya

kiya falak ko safar, chhor kar zamin main ne

kabhi main ghar-e-hira mein chhupa raha barson

diya jahan ko kabhi jam-e-akhiren main ne

sunaya hind mein a kar surud-e-rabani

pasand ki kabhi yunan ki sar zamin main ne

dayar-e-hind ne jis dam miri sada na suni

basaya khitta-e-japan-o-mulk-e-chin main ne

banaya zarron ki tarkib se kabhi alam

khilaf-e-maani-e-taalim-e-ahl-e-din main ne

lahu se lal kiya sainkron zaminon ko

jahan mein chher ke paikar-e-aql-o-din main ne

samajh mein ai haqiqat na jab sitaron ki

isi khayal mein raten guzar den main ne

dara saken na kalisa ki mujh ko talwaren

sikhaya masala-e-gardish-e-zamin main ne

kashish ka raz huwaida kiya zamane par

laga ke aina-e-aql-e-dur bin main ne

kiya asir shuaon ko, barq-e-muztar ko

banadi ghairat-e-jannat ye sarzamin main ne

magar khabar na mili ah! raz-e-hasti ki

kiya khirad se jahan ko tah-e-nagin main ne

hui jo chashm-e-mazahir parast wa akhir

tu paya khana-e-dil mein use makin main ne