ستائش گر ہے زاہد اس قدر جس باغ رضواں کا

ستائش گر ہے زاہد اس قدر جس باغ رضواں کا

وہ اک گلدستہ ہے ہم بے خودوں کے طاق نسیاں کا

بیاں کیا کیجیے بیداد کاوش ہائے مژگاں کا

کہ ہر یک قطرۂ خوں دانہ ہے تسبیح مرجاں کا

نہ آئی سطوت قاتل بھی مانع میرے نالوں کو

لیا دانتوں میں جو تنکا ہوا ریشہ نیستاں کا

دکھاؤں گا تماشا دی اگر فرصت زمانے نے

مرا ہر داغ دل اک تخم ہے سرو چراغاں کا

کیا آئینہ خانے کا وہ نقشہ تیرے جلوے نے

کرے جو پرتو خورشید عالم شبنمستاں کا

مری تعمیر میں مضمر ہے اک صورت خرابی کی

ہیولیٰ برق خرمن کا ہے خون گرم دہقاں کا

اگا ہے گھر میں ہر سو سبزہ ویرانی تماشا کر

مدار اب کھودنے پر گھاس کے ہے میرے درباں کا

خموشی میں نہاں خوں گشتہ لاکھوں آرزوئیں ہیں

چراغ مردہ ہوں میں بے زباں گور غریباں کا

ہنوز اک پرتو نقش خیال یار باقی ہے

دل افسردہ گویا حجرہ ہے یوسف کے زنداں کا

بغل میں غیر کی آج آپ سوتے ہیں کہیں ورنہ

سبب کیا خواب میں آ کر تبسم ہائے پنہاں کا

نہیں معلوم کس کس کا لہو پانی ہوا ہوگا

قیامت ہے سرشک آلودہ ہونا تیری مژگاں کا

نظر میں ہے ہماری جادۂ راہ فنا غالبؔ

کہ یہ شیرازہ ہے عالم کے اجزائے پریشاں کا

sataish gar hai zahid is qadar jis bagh-e-rizwan ka

wo ik guldasta hai ham be khudon ke taq-e-nasiyan ka

bayan kya kijiye bedad-e-kawish ha-e-mizhgan ka

ke har yak qatra-e-khun dana hai tasbih-e-marjan ka

na ai satwat-e-qatil bhi mane mere nalon ko

liya danton mein jo tinka hua resha nayastan ka

dikhaunga tamasha di agar fursat zamane ne

mira har dagh-e-dil ik tukhm hai sarw-e-charaghan ka

kiya aina khane ka wo naqsha tere jalwe ne

kare jo partau-e-khurshid-e-alam shabnamsitan ka

miri taamir mein muzmar hai ik surat kharabi ki

hayula barq-e-khirman ka hai khun-e-garm-e-dehqan ka

uga hai ghar mein har su sabza wirani tamasha kar

madar ab khodne par ghas ke hai mere darban ka

khamoshi mein nihan khun gashta lakhon arzuen hain

charagh-e-murda hun main be zaban gor-e-ghariban ka

hanoz ik partau-e-naqsh-e-khayal-e-yar baqi hai

dil-e-afsurda gawayya hujra hai yusuf ke zindan ka

baghal mein ghair ki aj ap sote hain kahin warna

sabab kya khwab mein a kar tabassum ha-e-pinhan ka

nahin maalum kis kis ka lahu pani hua hoga

qayamat hai sarishk aluda hona teri mizhgan ka

nazar mein hai hamari jada-e-rah-e-fana ghalib

ke ye shiraza hai alam ke ajza-e-pareshan ka