زندگی

ذرے ذرے میں دواں روح و رواں پاتا ہوں میں

زندگی کو ایک بحر بیکراں پاتا ہوں میں

غنچہ غنچہ نطق پر آمادہ آتا ہے نظر

پتے پتے کی زباں کو نغمہ خواں پاتا ہوں میں

زندہ ہستی کی خبر دیتی ہے رفتار نفس

بوئے گل کو زندگی کا ترجماں پاتا ہوں میں

برق کی جنبش ہو یا باد صبا کا ہو خرام

زندگی کا ہر تموج میں نشاں پاتا ہوں میں

اس سے آگے بھی ہیں روحیں اڑتی پھرتی بے شمار

طائر سدرہ کا جس جا آشیاں پاتا ہوں میں

ہو چکی ہے حکمراں جس نخل پر باد خزاں

اس کی رگ رگ میں بہار بے خزاں پاتا ہوں میں

چار سو راہ سفر پر دوڑتی ہے جب نظر

زندگی کو کارواں در کارواں پاتا ہوں میں

جانے والوں کی تباہی کے نشانوں میں نہاں

آنے والی ہستیوں کی بستیاں پاتا ہوں میں

الغرض سمجھے ہو جن کو موت کی بربادیاں

زندگی کے انقلاب ان میں نہاں پاتا ہوں میں

zarre zarre mein dawan ruh-o-rawan pata hun main

zindagi ko ek bahr-e-bekaran pata hun main

ghuncha ghuncha nutq par amada ata hai nazar

patte patte ki zaban ko naghma khwan pata hun main

zinda hasti ki khabar deti hai raftar-e-nafas

bu-e-gul ko zindagi ka tarjuman pata hun main

barq ki jumbish ho ya bad-e-saba ka ho khiram

zindagi ka har tamawwuj mein nishan pata hun main

is se age bhi hain ruhen urti phirti be shumar

tair-e-sidra ka jis ja ashiyan pata hun main

ho chuki hai hukmaran jis nakhl par bad-e-khizan

us ki rag rag mein bahar-e-be khizan pata hun main

char su rah-e-safar par daurti hai jab nazar

zindagi ko karwan dar karwan pata hun main

jane walon ki tabahi ke nishanon mein nihan

ane wali hastiyon ki bastiyan pata hun main

algharaz samjhe ho jin ko maut ki barbadiyan

zindagi ke inqilab un mein nihan pata hun main