زندگی مرگ کی مہلت ہی سہی

زندگی مرگ کی مہلت ہی سہی

بہر واماندہ اقامت ہی سہی

دوستی وجہ عداوت ہی سہی

دشمنی بہر رفاقت ہی سہی

طول دیتے ہو عداوت کو کیوں

مختصر قصۂ الفت ہی سہی

رکھ کسی وضع سے احسان کی خو

مجھ کو آزار سے راحت ہی سہی

آپ کا بھی نہیں چھٹتا دامن

میرے در پہ مری شامت ہی سہی

عاقبت حشر کو آنا اک دن

روٹھ جانا تری عادت ہی سہی

کچھ بھی اے بخت میسر ہے تجھے

یا تجسس سے فراغت ہی سہی

کوچۂ غیر میں چل کر رہیے

گر نہیں عیش تو حسرت ہی سہی

یہی تقریب ستم ہو اے کاش

ہر طرح غیر سے نفرت ہی سہی

اب تو اٹھ آئے لحد سے بے تاب

نہ سہی چال قیامت ہی سہی

یادگاری کی کوئی بات تو ہو

موت اپنی تری رخصت ہی سہی

عدل و انصاف قیامت معلوم

آہ و فریاد کی فرصت ہی سہی

اے قلقؔ شکر ستم بے جا کیوں

آہ و فریاد کی فرصت ہی سہی

zindagi marg ki mohlat hi sahi

bahr-e-wamanda iqamat hi sahi

dosti wajh-e-adawat hi sahi

dushmani bahr-e-rifaqat hi sahi

tul dete ho adawat ko kyun

mukhtasar qissa-e-ulfat hi sahi

rakh kisi waza se ehsan ki khu

mujh ko azar se rahat hi sahi

ap ka bhi nahin chhutta daman

mere dar pe miri shamat hi sahi

aqibat hashr ko ana ik din

ruth jana tiri adat hi sahi

kuchh bhi ai bakht-e-muyassar hai tujhe

ya tajassus se faraghat hi sahi

kucha-e-ghair mein chal kar rahiye

gar nahin aish to hasrat hi sahi

yahi taqrib-e-sitam ho ai kash

har tarah ghair se nafrat hi sahi

ab to uth ae lahad se be tab

na sahi chal qayamat hi sahi

yadgari ki koi bat to ho

maut apni tiri rukhsat hi sahi

adl-o-insaf qayamat maalum

ah-o-fariyad ki fursat hi sahi

ai qalaq shukr-e-sitam be ja kyun

ah-o-fariyad ki fursat hi sahi