ساقیا ابر ہے دے جام شتاب ایک پر ایک

ساقیا ابر ہے دے جام شتاب ایک پر ایک

آج محفل میں گرے مست شراب ایک پر ایک

گل بازی ہے حسینوں میں مرا افسانہ

پھینک دیتا ہے محبت کی کتاب ایک پر ایک

جوش پر ہے جو ترا حسن تو اے پردہ نشیں

روز کرتا ہے غضب بند نقاب ایک پر ایک

توڑ اس طرح سے اے نالۂ دل ساتوں فلک

کہ گریں ٹوٹ کے یہ خانہ خراب ایک پر ایک

لب جو سیر کو آیا ہے جو وہ بحر جمال

ٹوٹا پڑتا ہے تماشے کو حباب ایک پر ایک

یاد آتی ہے انہیں دم بہ دم اک بات نئی

روز آتا ہے مرے خط کا جواب ایک پر ایک

جب کبھی داغؔ کیا ہم نے سوال بوسہ

سیکڑوں اس نے دئے سخت جواب ایک پر ایک

saqiya abr hai de jam shitab ek par ek

aj mahfil mein gire mast-e-sharab ek par ek

gul-e-bazi hai hasinon mein mira afsana

phenk deta hai mohabbat ki kitab ek par ek

josh par hai jo tira husn to ai parda nashin

roz karta hai ghazab band-e-naqab ek par ek

tor is tarah se ai nala-e-dil saton falak

ke giren tut ke ye khana kharab ek par ek

lab jo sair ko aya hai jo wo bahr-e-jamal

tuta parta hai tamashe ko habab ek par ek

yad ati hai unhen dam ba dam ik bat nai

roz ata hai mire khat ka jawab ek par ek

jab kabhi dagh kiya ham ne sawal-e-bosa

saikron us ne diye sakht jawab ek par ek