سب کو ہے منظور اس رخسار گل گوں کی طرف

سب کو ہے منظور اس رخسار گل گوں کی طرف

دیکھتا ہے کون میری چشم پر خوں کی طرف

ساتھ ناقہ کے خدا جانے کدھر رم کر گئی

گرد محمل بھی نہ پہنچی آہ مجنوں کی طرف

جان و دل میں بے طرح بگڑی ہے تیرے عشق میں

کیجیے دل کی طرف یا جان محزوں کی طرف

زلف و رخ ہے روز و شب کیا دیکھتے رہتے ہو تم

منصفی سے ٹک تو دیکھو اپنے مفتوں کی طرف

خضر تک کیجو مدد تو بھی کہ تا بھولے نہ راہ

ناقۂ لیلیٰ چلا ہے آج مجنوں کی طرف

گرچہ ہیں تیری ہی گردش سے نگہ کی ہم خراب

پر اشارہ اس کا کر دیتے ہیں گردوں کی طرف

کیونکہ آوے چین تیرے وحشیوں کو بعد مرگ

خاک ہو کر جب تلک جاویں نہ ہاموں کی طرف

نام میں بھی ہے عیاں عاشق کی آشفتہ سری

دیکھتے تو ہو گے اکثر بید مجنوں کی طرف

بسکہ اس کی زلف کے آشفتہ ہیں ہم اے حسنؔ

شعر میں بھی دھیان ہے پیچیدہ مضموں کی طرف

sab ko hai manzur is rukhsar-e-gul gun ki taraf

dekhta hai kaun meri chashm pur khun ki taraf

sath naqa ke khuda jane kidhar ram kar gai

gard mahmil bhi na pahunchi ah majnun ki taraf

jan-o-dil mein be tarah bigri hai tere ishq mein

kijiye dil ki taraf ya jan mahzon ki taraf

zulf-o-rukh hai roz-o-shab kya dekhte rahte ho tum

munsifi se tuk to dekho apne maftun ki taraf

khizr tak kijo madad tu bhi ke ta bhule na rah

naqa-e-laila chala hai aj majnun ki taraf

garche hain teri hi gardish se nigah ki ham kharab

par ishara us ka kar dete hain gardun ki taraf

kyunke awe chain tere wahshiyon ko baad-e-marg

khak ho kar jab talak jawen na hamun ki taraf

nam mein bhi hai ayan ashiq ki ashufta siri

dekhte to hoge aksar baid-e-majnun ki taraf

baske us ki zulf ke ashufta hain ham ai husn

sher mein bhi dhyan hai pechida mazmun ki taraf