ساقیا مر کے اٹھیں گے ترے مے خانے سے

ساقیا مر کے اٹھیں گے ترے مے خانے سے

عہد و پیماں ہیں یہی زیست میں پیمانے سے

تو کہاں آئی مرا درد بٹانے کے لیے

اے شب ہجر نکل جا مرے غم خانے سے

کون ہوتا ہے مصیبت میں کسی کا دل سوز

اٹھ گئی شمع بھی جل کر مرے کاشانے سے

کچھ یہی کوہ کن و قیس پہ گزری ہوگی

ملتی جلتی ہے کہانی مرے افسانے سے

جبہ فرسائے در کعبہ تھے کل تک تو ظہیرؔ

گرتے پڑتے ہوئے آج آتے ہیں میخانے سے

saqiya mar ke uthenge tire mai khane se

ahd-o-paiman hain yahi zist mein paimane se

tu kahan ai mira dard batane ke liye

ai shab-e-hijr nikal ja mire gham khane se

kaun hota hai musibat mein kisi ka dil soz

uth gai shama bhi jal kar mire kashane se

kuchh yahi koh kin-o-qais pe guzri hogi

milti jalti hai kahani mire afsane se

jubba farsa-e-dar-e-kaaba the kal tak to zahir

girte parte hue aj ate hain maikhane se