رشک کہتا ہے کہ اس کا غیر سے اخلاص حیف

رشک کہتا ہے کہ اس کا غیر سے اخلاص حیف

عقل کہتی ہے کہ وہ بے مہر کس کا آشنا

ذرہ ذرہ ساغر مے خانۂ نیرنگ ہے

گردش مجنوں بہ چشمک‌ ہائے لیلیٰ آشنا

شوق ہے ساماں طراز نازش ارباب عجز

ذرہ صحرا دست گاہ و قطرہ دریا آشنا

میں اور ایک آفت کا ٹکڑا وہ دل وحشی کہ ہے

عافیت کا دشمن اور آوارگی کا آشنا

شکوہ سنج رشک ہم دیگر نہ رہنا چاہئے

میرا زانو مونس اور آئینہ تیرا آشنا

کوہ کن نقاش یک تمثال شیریں تھا اسدؔ

سنگ سے سر مار کر ہووے نہ پیدا آشنا

خود پرستی سے رہے باہم دگر نا آشنا

بیکسی میری شریک آئینہ تیرا آشنا

آتش موئے دماغ شوق ہے تیرا تپاک

ورنہ ہم کس کے ہیں اے داغ تمنا آشنا

جوہر آئینہ جز رمز سر مژگاں نہیں

آشنا کی ہم دگر سمجھے ہے ایما آشنا

ربط یک شیرازۂ وحشت ہیں اجزائے بہار

سبزہ بیگانہ صبا آوارہ گل نا آشنا

بے دماغی شکوہ سنج رشک ہم دیگر نہیں

یار تیرا جام مے خمیازہ میرا آشنا

rashk kahta hai ke us ka ghair se ikhlas haif

aql kahti hai ke wo be mehr kis ka ashna

zarra zarra saghar-e-mai khana-e-nairang hai

gardish-e-majnun ba chashmak ha-e-laila ashna

shauq hai saman taraz-e-nazish-e-arbab-e-ijz

zarra sahra dast gah-o-qatra dariya ashna

main aur ek afat ka tukra wo dil-e-wahshi ke hai

afiyat ka dushman aur awargi ka ashna

shikwa sanj-e-rashk ham digar na rahna chahiye

mera zanu munis aur aina tera ashna

koh kin naqqash-e-yak timsal-e-shirin tha asad

sang se sar mar kar howe na paida ashna

khud parasti se rahe baham digar na ashna

bekasi meri sharik-e-aina tera ashna

atish-e-mu-e-dimagh-e-shauq hai tera tapak

warna ham kis ke hain ai dagh-e-tamanna ashna

jauhar-e-aina juz ramz-e-sar-e-mizhgan nahin

ashna ki ham digar samjhe hai ima ashna

rabt-e-yak shiraza-e-wahshat hain ajza-e-bahar

sabza begana saba awara gul na ashna

be dimaghi shikwa sanj-e-rashk ham digar nahin

yar tera jam-e-mai khamyaza mera ashna