رند خراب حال کو زاہد نہ چھیڑ تو

رند خراب حال کو زاہد نہ چھیڑ تو

تجھ کو پرائی کیا پڑی اپنی نبیڑ تو

ناخن خدا نہ دے تجھے اے پنجۂ جنوں

دے گا تمام عقل کے بخیے ادھیڑ تو

اس صید مضطرب کو تحمل سے ذبح کر

دامان و آستیں نہ لہو میں لتھیڑ تو

چھٹتا ہے کون مر کے گرفتار دام زلف

تربت پہ اس کی جال کا پائے گا پیڑ تو

اے زاہد دو رنگ نہ پیر آپ کو بنا

مانند صبح کاذب ابھی ہے ادھیڑ تو

یہ تنگنائے دہر نہیں منزل فراغ

غافل نہ پاؤں حرص کے پھیلا سکیڑ تو

ہو قطع نخل الفت اگر پھر بھی سبز ہو

کیا ہو جو پھینکے جڑ ہی سے اس کو اکھیڑ تو

جو سوتی بھیڑ باعث غوغا جگائے پھر

دروازہ گھر کا اس سگ دنیا پہ بھیڑ تو

عمر رواں کا توسن چالاک اس لیے

تجھ کو دیا کہ جلد کرے یاں سے ایڑ تو

آوارگی سے کوئے محبت کی ہاتھ اٹھا

اے ذوقؔ یہ اٹھا نہ سکے گا کھکھیڑ تو

rind-e-kharab hal ko zahid na chher to

tujh ko parai kya pari apni nabir to

nakhun khuda na de tujhe ai panja-e-junun

dega tamam aql ke bakhiye adher to

is said-e-muztarib ko tahammul se zabh kar

daman-o-astin na lahu mein lather to

chhutta hai kaun mar ke giraftar dam-e-zulf

turbat pe us ki jal ka paega per to

ai zahid do rang na pir ap ko bana

manind-e-subh-e-kazib abhi hai adher to

ye tangnae dahr nahin manzil faragh

ghafil na paon hirs ke phaila suker to

ho qat-e-nakhl-e-ulfat agar phir bhi sabz ho

kya ho jo phenke jur hi se us ko ukher to

jo soti bhir bais-e-ghaugha jagae phir

darwaza ghar ka is sag-e-duniya pe bhir to

umr-e-rawan ka tosun-e-chalak is liye

tujh ko diya ke jald kare yan se er to

awargi se ku-e-mohabbat ki hath utha

ai zauq ye utha na sakega khakher to