رخ پری چشم پری زلف پری آن پری

رخ پری چشم پری زلف پری آن پری

کیوں نہ اب نام خدا ہو ترے قربان پری

جھمکے جھمکے وہ ثریا کے کرن پھول وہ پھول

بندے بالے پری موتی پری اور کان پری

رشک خورشید جبیں ابر سیہ سی پٹی

لہر چوٹی کی غضب زلف پریشان پری

حسن گل زار قمر شکل صراحی گردن

مہ جبیں سیب ذقن چاہ زنخدان پری

مار غمزہ کی بلا تیر نگہ دست سناں

تیغ ابرو کی ستم ترکش مژگان پری

مسکرانے کی ادا جیسے چمک بجلی کی

آن ہنسنے کی قیامت لب و دندان پری

آنکھ مستی کی بھری شوخ نگاہیں چنچل

قہر کاجل کی کھچاوٹ مسی و پان پری

بینی اور نتھ کا وہ عالم کہ چھدے دل جس سے

حور چنی کی جھلک گوہر غلطان پری

دھکدھکی چاند سی جگنو بھی ستاروں کی مثال

عطرداں طرفہ وہ توڑے بھی درخشان پری

چاک سینے کا غضب صاف بدن موتی سا

ایک تصویر سی کرتی کا گریبان پری

پشت گلبرگ شکم سیم کمر تار نگاہ

سان بلور گلاوٹ میں ہر اک ران پری

گھیرا پشواز کا وہ جس کے کناری قرباں

چال آفت کی نشاں جنبش دامان پری

کیا کہوں اس کے سراپا کی میں تعریف نظیرؔ

قد پری دھج پری عالم پری اور شان پری

rukh pari chashm-e-pari zulf-e-pari an pari

kyun na ab nam-e-khuda ho tire qurban pari

jhamke jhamke wo surayya ke kiran phul wo phul

bande bale pari moti pari aur kan pari

rashk-e-khurshid jabin abr-e-siyah si piti

lahr choti ki ghazab zulf-e-pareshan pari

husn-e-gul zar qamar shakl-e-surahi gardan

mah jabin seb-e-zaqan chah-e-zanakhdan pari

mar ghamza ki bala tir-e-nigah dast-e-sinan

tegh-e-abru ki sitam tarkash-e-mizhgan-e-pari

muskurane ki ada jaise chamak bijli ki

an hansne ki qayamat lab-o-dandan pari

ankh masti ki bhari shokh nigahen chanchal

qahr kajal ki khichot missi-o-pan pari

bini aur nath ka wo alam ke chhide dil jis se

hur chuni ki jhalak gauhar ghalatan pari

dhakdhaki chand si jugnu bhi sitaron ki misal

itrdan turfa wo tore bhi darakhshan-e-pari

chak sine ka ghazab saf badan moti sa

ek taswir si karti ka gareban-e-pari

pusht gulbarg shikam sim kamar tar-e-nigah

san bilur gulot mein har ik ran pari

ghera pishwaz ka wo jis ke kinari qurban

chal afat ki nishan jumbish-e-daman-e-pari

kya kahun us ke sarapa ki main taarif nazir

qad pari dhaj pari alam pari aur shan-e-pari