رسمِ جفا کامیاب ، دیکھئیے ، کب تک رہے

رسمِ جفا کامیاب ، دیکھئیے ، کب تک رہے

حُبِ وطن، مستِ خواب، دیکھئیے ، کب تک رہے

دل پہ رہا مدتوں غلبۂ یاس و ہراس

قبضۂ خرم و حجاب، دیکھئیے ، کب تک رہے

تابہ کجا ہوں دراز سلسلہ ہائے فریب

ضبط کی، لوگوں میں تاب، دیکھئیے ، کب تک رہے

پردۂ اصلاح میں کوششِ تخریب کا

خلقِ خدا پر عذاب، دیکھئیے ، کب تک رہے

نام سے قانون کے ، ہوتے ہیں کیا کیا ستم

جبر، بہ زیرِ انقلاب، دیکھئیے ، کب تک رہے

دولتِ ہندوستان قبضۂ اغیار میں

بے عدد و بے حساب، دیکھئیے ، کب تک رہے

ہے تو کچھ اُکھڑا ہوا بزمِ حریفاں کا رنگ

اب یہ شراب و کباب، دیکھئیے ، کب تک رہے

حسرتِ آزاد پر جورِ غلامانِ وقت

از رہِ بُغض و عناد، دیکھئیے ، کب تک رہے

rasm-e-jafa kamyab, dekhiye, kab tak rahe

hub-e-watan, mast-e-khwab, dekhiye, kab tak rahe

dil pe raha muddaton ghalba-e-yas-o-hiras

qabza-e-khurram-o-hijab, dekhiye, kab tak rahe

taba kuja hun daraz silsila ha-e-fareb

zabt ki, logon mein tab, dekhiye, kab tak rahe

parda-e-islah mein koshish-e-takhrib ka

khalq-e-khuda par azab, dekhiye, kab tak rahe

nam se qanun ke, hote hain kya kya sitam

jabr, ba zer-e-inqilab, dekhiye, kab tak rahe

daulat-e-hindostan qabza-e-aghyar mein

be adad-o-be hisab, dekhiye, kab tak rahe

hai to kuchh ukhra hua bazm-e-harifan ka rang

ab ye sharab-o-kabab, dekhiye, kab tak rahe

hasrat-e-azad par jaur-e-ghulaman-e-waqt

az rah-e-bughz-o-inad, dekhiye, kab tak rahe