رخ جو زیر سنبل پر پیچ و تاب آ جائے گا

رخ جو زیر سنبل پر پیچ و تاب آ جائے گا

پھر کے برج سنبلہ میں آفتاب آ جائے گا

تیرا احساں ہوگا قاصد گر شتاب آ جائے گا

صبر مجھ کو دیکھ کر خط کا جواب آ جائے گا

ہو نہ بیتاب اتنا گر اس کا عتاب آ جائے گا

تو غضب میں اے دل خانہ خراب آ جائے گا

اس قدر رونا نہیں بہتر بس اب اشکوں کو روک

ورنہ طوفاں دیکھ اے چشم پر آب آ جائے گا

پیش ہووے گا اگر تیرے گناہوں کا حساب

تنگ ظالم عرصۂ روز حساب آ جائے گا

دیکھ کر دست ستم میں تیری تیغ آب دار

میرے ہر زخم جگر کے منہ میں آب آ جائے گا

اپنی چشم مست کی گردش نہ اے ساقی دکھا

دیکھ چکر میں ابھی جام شراب آ جائے گا

خوب ہوگا ہاں جو سینہ سے نکل جائے گا تو

چین مجھ کو اے دل پر اضطراب آ جائے گا

اے ظفرؔ اٹھ جائے گا جب پردہ شرم و حجاب

سامنے وہ یار میرے بے حجاب آ جائے گا

rukh jo zer-e-sumbul pur pech-o-tab a jaega

phir ke biraj-e-sumbula mein aftab a jaega

tera ehsan hoga qasid gar shitab a jaega

sabr mujh ko dekh kar khat ka jawab a jaega

ho na betab itna gar us ka itab a jaega

tu ghazab mein ai dil khana kharab a jaega

is qadar rona nahin behtar bas ab ashkon ko rok

warna tufan dekh ai chashm par ab a jaega

pesh howe ga agar tere gunahon ka hisab

tang zalim arsa-e-roz-e-hisab a jaega

dekh kar dast-e-sitam mein teri tegh-e-ab dar

mere har zakhm-e-jigar ke munh mein ab a jaega

apni chashm-e-mast ki gardish na ai saqi dikha

dekh chakkar mein abhi jam-e-sharab a jaega

khub hoga han jo sina se nikal jaega to

chain mujh ko ai dil par iztirab a jaega

ai zafar uth jaega jab parda sharm-o-hijab

samne wo yar mere be hijab a jaega