راز چشم مے گوں ہے کیف مدعا میرا

راز چشم مے گوں ہے کیف مدعا میرا

غیر کی نظر سے ہے دور میکدہ میرا

واسطے کی خوبی نے سہل منزلیں کر دیں

حسن عشق کا رہبر عشق رہنما میرا

کر دیا مجھے بے خود ان کی بے نیازی نے

کہہ رہا ہوں خود ان سے دل سنبھالنا میرا

ہائے خوف بدنامی وائے فکر ناکامی

بے وفا کے ہاتھوں میں حاصل وفا میرا

لطف خلوت و جلوت ہم نہ پا سکے لیکن

دھوم ہر طرف ان کی ذکر جا بہ جا میرا

طرز والہانہ کی داد کب ملی مجھ کو

ناز دوست کب نکلا صورت آشنا میرا

سوچنے لگے گی کچھ تیری خوش نگاہی بھی

رائیگاں نہ جائے گا یوں ہی دیکھنا میرا

میں نے جب کبھی دیکھا سر جھکا لیا تو نے

تو نے جب کبھی دیکھا دل تڑپ گیا میرا

عشرت حجاب از خود چارہ ساز دل کیا ہو

ساز ہو جب اے ظالم سوز آشنا میرا

میری خستہ حالی نے سعیٔ خود شناسی کی

ان کی خود نمائی نے جب کیا گلہ میرا

ہے جو حضرت منظورؔ اعتبار ایں و آں

اذن بے خودی لے کر پوچھئے پتا میرا

raz chashm-e-mai gun hai kaif-e-muddaa mera

ghair ki nazar se hai dur maikada mera

waste ki khubi ne sahl manzilen kar den

husn-e-ishq ka rahbar ishq rahnuma mera

kar diya mujhe be khud un ki be niyazi ne

kah raha hun khud un se dil sambhalna mera

hae khauf badnami wae fikr nakami

be wafa ke hathon mein hasil-e-wafa mera

lutf-e-khalwat-o-jalwat ham na pa sake lekin

dhum har taraf un ki zikr ja ba ja mera

tarz walhana ki dad kab mili mujh ko

naz dost kab nikla surat ashna mera

sochne lagegi kuchh teri khush nigahi bhi

raigan na jaega yun hi dekhna mera

main ne jab kabhi dekha sar jhuka liya tu ne

tu ne jab kabhi dekha dil tarap gaya mera

ishrat-e-hijab az khud chara saz-e-dil kya ho

saz ho jab ai zalim soz ashna mera

meri khasta hali ne sai-e-khud shanasi ki

un ki khud numai ne jab kiya gila mera

hai jo hazrat manzur etibar ain-o-an

izn-e-be khudi le kar puchhiye pata mera