آنکھوں کو انتظار سے گرویدہ کر چلے

آنکھوں کو انتظار سے گرویدہ کر چلے

تم یہ تو خوب کارِ پسندیدہ کر چلے

مایوس دل کو پھر سے وہ شوریدہ کر چلے

بیدار سارے فتنہ و خوابیدہ کر چلے

اظہار التفات کے پردے میں اور بھی

وہ عقدہ ہائے شوق کو پیچیدہ کر چلے

ہم بے خودوں سے چھپ نہ سکا راز آرزو

سب اُن سے عرضِ حال دل و دیدہ کر چلے

تسکینِ اضطراب کو آئے تھے وہ مگر

بے تابیوں کی روح کو بالیدہ کر چلے

یہ طرفہ ماجرا ہے کہ حسرت سے مل کے وہ

کچھ جان و دل کو اور بھی شوریدہ کر چلے

ankhon ko intizar se girwida kar chale

tum ye to khub kar-e-pasandida kar chale

mayus dil ko phir se wo shorida kar chale

bedar sare fitna-o-khwabida kar chale

izhar-e-iltifat ke parde mein aur bhi

wo uqda ha-e-shauq ko pechida kar chale

ham be khudon se chhup na saka raz-e-arzu

sab un se arz-e-hal-e-dil-o-dida kar chale

taskin-e-iztirab ko ae the wo magar

be tabiyon ki ruh ko balida kar chale

ye turfa majra hai ke hasrat se mil ke wo

kuchh jan-o-dil ko aur bhi shorida kar chale