دیت اس قاتل بے رحم سے کیا لیجئے گا

دیت اس قاتل بے رحم سے کیا لیجئے گا

اپنی ہی آنکھوں سے اب خون بہا لیجئے گا

پھر نہیں ہونے کی تقصیر تو ایسی ہرگز

اب کسی طرح میری جان بچا لیجئے گا

اس قدر سنگ دلی تم کو نہیں ہے لازم

کسی مظلوم کی گاہے تو دعا لیجئے گا

لخت دل خاک میں دیتا ہے کوئی بھی رہنے

گر پڑے اشک تو آنکھوں سے اٹھا لیجئے گا

پھر نہ پچھتاو کہیں بعد مرے جانے کے

گالیاں اور ہوں باقی تو سنا لیجئے گا

روٹھ کر جائے کوئی اپنے سے پیارے تو وہیں

چاہیئے آپ گلے پڑ کے منا لیجئے گا

اپنے مشتاق کو لازم ہے کہ گاہے ماہے

غیر کی آنکھ بچا گھر میں بلا لیجئے گا

ایک مدت ہوئی کچھ حرف و حکایت ہی نہیں

جی میں ہے آج تو باتوں میں لگا لیجئے گا

کسی جلسے میں جو ایمانؔ کہو تو جانیں

گھر میں یوں بیٹھے ہوئے شعر بنا لیجئے گا

det us qatil-e-be rahm se kya lijiye ga

apni hi ankhon se ab khun baha lijiye ga

phir nahin hone ki taqsir to aisi hargiz

ab kisi tarah meri jan bacha lijiye ga

is qadar sang dili tum ko nahin hai lazim

kisi mazlum ki gahe to dua lijiye ga

lakht-e-dil khak mein deta hai koi bhi rahne

gir pare ashk to ankhon se utha lijiye ga

phir na pachhtao kahin baad mire jane ke

galiyan aur hun baqi to suna lijiye ga

ruth kar jae koi apne se pyare to wahin

chahiye ap gale par ke mana lijiye ga

apne mushtaq ko lazim hai ke gahe mahe

ghair ki ankh bacha ghar mein bala lijiye ga

ek muddat hui kuchh harf-o-hikayat hi nahin

ji mein hai aj to baton mein laga lijiye ga

kisi jalse mein jo iman kaho to janen

ghar mein yun baithe hue sher bana lijiye ga