آپ کا اعتبار کون کرے

آپ کا اعتبار کون کرے

روز کا انتظار کون کرے

ذکر مہر و وفا تو ہم کرتے

پر تمہیں شرمسار کون کرے

ہو جو اس چشم مست سے بے خود

پھر اسے ہوشیار کون کرے

تم تو ہو جان اک زمانے کی

جان تم پر نثار کون کرے

آفت روزگار جب تم ہو

شکوۂ روزگار کون کرے

اپنی تسبیح رہنے دے زاہد

دانہ دانہ شمار کون کرے

ہجر میں زہر کھا کے مر جاؤں

موت کا انتظار کون کرے

آنکھ ہے ترک زلف ہے صیاد

دیکھیں دل کا شکار کون کرے

وعدہ کرتے نہیں یہ کہتے ہیں

تجھ کو امیدوار کون کرے

داغؔ کی شکل دیکھ کر بولے

ایسی صورت کو پیار کون کرے

ap ka etibar kaun kare

roz ka intizar kaun kare

zikr-e-mehr-o-wafa to ham karte

par tumhen sharmsar kaun kare

ho jo us chashm-e-mast se be khud

phir use hoshyar kaun kare

tum to ho jan ik zamane ki

jan tum par nisar kaun kare

afat-e-rozgar jab tum ho

shikwa-e-rozgar kaun kare

apni tasbih rahne de zahid

dana dana shumar kaun kare

hijr mein zahr kha ke mar jaun

maut ka intizar kaun kare

ankh hai tark-e-zulf hai sayyad

dekhen dil ka shikar kaun kare

waada karte nahin ye kahte hain

tujh ko umidwar kaun kare

dagh ki shakl dekh kar bole

aisi surat ko pyar kaun kare