دعا
Allama Iqbal (1877–1938)یا رب! دلِ مسلم کو وہ زندہ تمنّا دے
جو قلب کو گرما دے، جو رُوح کو تڑپا دے
پھر وادیِ فاراں کے ہر ذرّے کو چمکا دے
پھر شوقِ تماشا دے، پھر ذوقِ تقاضا دے
محرومِ تماشا کو پھر دیدۂ بِینا دے
دیکھا ہے جو کچھ میں نے اَوروں کو بھی دِکھلا دے
بھٹکے ہوئے آہُو کو پھر سُوئے حرم لے چل
اس شہر کے خُوگر کو پھر وسعتِ صحرا دے
پیدا دلِ ویراں میں پھر شورشِ محشر کر
اس محملِ خالی کو پھر شاہدِ لیلا دے
اس دور کی ظُلمت میں ہر قلبِ پریشاں کو
وہ داغِ محبّت دے جو چاند کو شرما دے
رفعت میں مقاصد کو ہمدوشِ ثریّا کر
خودداریِ ساحل دے، آزادیِ دریا دے
بے لَوث محبّت ہو، بے باک صداقت ہو
سینوں میں اُجالا کر، دل صورتِ مینا دے
احساس عنایت کر آثارِ مصیبت کا
امروز کی شورش میں اندیشۂ فردا دے
مَیں بُلبلِ نالاں ہوں اِک اُجڑے گُلستاں کا
تاثیر کا سائل ہوں، محتاج کو، داتا دے!
ya rab! dil-e-muslim ko wo zinda tamanna de
jo qalb ko garma de, jo ruh ko tarpa de
phir wadi-e-faran ke har zarre ko chamka de
phir shauq-e-tamasha de, phir zauq-e-taqaza de
mahrum-e-tamasha ko phir dida-e-bina de
dekha hai jo kuchh main ne auron ko bhi dikhla de
bhatke hue ahu ko phir su-e-haram le chal
is shahr ke khugar ko phir wusat-e-sahra de
paida dil-e-wiran mein phir shorish-e-mahshar kar
is mahmil-e-khali ko phir shahid-e-lila de
is daur ki zulmat mein har qalb-e-pareshan ko
wo dagh-e-mohabbat de jo chand ko sharma de
rifat mein maqasid ko hamdosh-e-surayya kar
khuddari-e-sahil de, azadi-e-dariya de
be laus mohabbat ho, be bak sadaqat ho
sinon mein ujala kar, dil surat-e-mina de
ehsas inayat kar asar-e-musibat ka
imroz ki shorish mein andesha-e-farda de
main bulbul-e-nalan hun ik ujre gulistan ka
tasir ka sail hun, mohtaj ko, data de!