دوری میں کیوں کہ ہو نہ تمنا حضور کی

دوری میں کیوں کہ ہو نہ تمنا حضور کی

منزل کو میری قرب سے نسبت ہے دور کی

فرقت نے اس کی وصل کی تشویش دور کی

تسکیں نہیں ہے یوں بھی دل ناصبور کی

موسیٰ کے سر پہ پاؤں ہے اہل نگاہ کا

اس کی گلی میں خاک اڑی کوہ طور کی

کہتا ہے انجمن کو تری خلد مدعی

اس بوالہوس کے دل میں تمنا ہے حور کی

واعظ نے میکدے کو جو دیکھا تو جل گیا

پھیلا گیا چراند شراب طہور کی

موسیٰ کو کیوں نہ موج تجلی دھکیل دے

جلوے سے اس کے گل ہوئی مشعل شعور کی

ارباب وقت جانتے ہیں روزگار نے

کی سہو سے وفا تو تلافی ضرور کی

رسوائیوں کا حوصلہ گھٹ گھٹ کے بڑھ گیا

ساماں ہے خامشی مری شور نشور کی

میل آسماں کا سوئے زمیں بے سبب نہیں

زیر قدم جگہ ہے سر پر غرور کی

اس سے نہ ملیے جس سے ملے دل تمام عمر

سوجھی ہمیں بھی ہجر میں آخر کو دور کی

پامال کر رہا ہے سیہ روزیوں کا جوش

مٹی خراب ہے مرے کلبے میں نور کی

کیا ایک قرب غیر کا صدمہ نہ پوچھیے

ہیں دل کے آس پاس بلا دور دور کی

مضموں مرے اڑائے قلقؔ سب نے اس قدر

سنتا ہوں میں ترانہ زبانی طیور کی

duri mein kyun ke ho na tamanna huzur ki

manzil ko meri qurb se nisbat hai dur ki

furqat ne us ki wasl ki tashwish dur ki

taskin nahin hai yun bhi dil-e-nasabur ki

musa ke sar pe paon hai ahl-e-nigah ka

us ki gali mein khak uri koh-e-tur ki

kahta hai anjuman ko tiri khuld muddai

is bawalhos ke dil mein tamanna hai hur ki

waiz ne maikade ko jo dekha to jal gaya

phaila gaya chirand sharab-e-tahur ki

musa ko kyun na mauj-e-tajalli dhakel de

jalwe se us ke gul hui mashal shuur ki

arbab-e-waqt jante hain rozgar ne

ki saho se wafa to talafi zarur ki

ruswaiyon ka hausla ghut ghut ke barh gaya

saman hai khamushi miri shor-e-nushur ki

mel asman ka su-e-zamin be sabab nahin

zer-e-qadam jagah hai sar par ghurur ki

us se na miliye jis se mile dil tamam umr

sujhi hamen bhi hijr mein akhir ko dur ki

pamal kar raha hai siyah roziyon ka josh

mitti kharab hai mire kulbe mein nur ki

kya ek qurb ghair ka sadma na puchhiye

hain dil ke as pas bala dur dur ki

mazmun mire urae qalaq sab ne is qadar

sunta hun main tarana zabani tuyur ki