آغوش احتیاط میں رکھ لوں جگر کہیں

آغوش احتیاط میں رکھ لوں جگر کہیں

ڈرتا ہوں لے اڑے نہ کسی کی نظر کہیں

غربت میں اجنبی کا بھی ہوتا ہے گھر کہیں

دن بھر کہیں گزاریے یا رات بھر کہیں

اغیار ہوں کہیں بت شوریدہ سر کہیں

سب کچھ ہو آہ میں تو ہو اپنی اثر کہیں

یوں اف نہ باغ دہر میں بربادی ہو کوئی

بلبل کا آشیاں ہے کہیں بال و پر کہیں

میں آج اپنی آہ کا کرتا ہوں امتحاں

ہوں آسماں زمین نہ زیر و زبر کہیں

قید قفس میں حسرت پرواز کیوں رہے

صیاد جو اڑا دے مرے بال و پر کہیں

رہتی ہے ان کی یاد مرے دل میں ہر گھڑی

اوجؔ ان کے دل میں کاش ہو میرا بھی گھر کہیں

aghosh-e-ehtiyat mein rakh lun jigar kahin

darta hun le ure na kisi ki nazar kahin

ghurbat mein ajnabi ka bhi hota hai ghar kahin

din bhar kahin guzariye ya rat bhar kahin

aghyar hun kahin but-e-shorida sar kahin

sab kuchh ho ah mein to ho apni asar kahin

yun uf na bagh-e-dahr mein barbadi ho koi

bulbul ka ashiyan hai kahin bal-o-par kahin

main aj apni ah ka karta hun imtihan

hun asman zamin na zer-o-zabar kahin

qaid-e-qafas mein hasrat-e-parwaz kyun rahe

sayyad jo ura de mire bal-o-par kahin

rahti hai un ki yad mire dil mein har ghari

auj un ke dil mein kash ho mera bhi ghar kahin