دور سے آئے تھے ساقی سن کے مے خانے کو ہم

دور سے آئے تھے ساقی سن کے مے خانے کو ہم

بس ترستے ہی چلے افسوس پیمانے کو ہم

مے بھی ہے مینا بھی ہے ساغر بھی ہے ساقی نہیں

دل میں آتا ہے لگا دیں آگ مے خانے کو ہم

کیوں نہیں لیتا ہماری تو خبر اے بے خبر

کیا ترے عاشق ہوئے تھے درد و غم کھانے کو ہم

ہم کو پھنسنا تھا قفس میں کیا گلہ صیاد کا

بس ترستے ہی رہے ہیں آب اور دانے کو ہم

طاق ابرو میں صنم کے کیا خدائی رہ گئی

اب تو پوجیں گے اسی کافر کے بت خانے کو ہم

باغ میں لگتا نہیں صحرا سے گھبراتا ہے دل

اب کہاں لے جا کے بیٹھیں ایسے دیوانے کو ہم

کیا ہوئی تقصیر ہم سے تو بتا دے اے نظیرؔ

تاکہ شادی مرگ سمجھیں ایسے مر جانے کو ہم

dur se ae the saqi sun ke mai khane ko ham

bas taraste hi chale afsos paimane ko ham

mai bhi hai mina bhi hai saghar bhi hai saqi nahin

dil mein ata hai laga den ag mai khane ko ham

kyun nahin leta hamari to khabar ai be khabar

kya tire ashiq hue the dard-o-gham khane ko ham

ham ko phansna tha qafas mein kya gila sayyad ka

bas taraste hi rahe hain ab aur dane ko ham

taq-e-abru mein sanam ke kya khudai rah gai

ab to pujenge usi kafir ke but khane ko ham

bagh mein lagta nahin sahra se ghabrata hai dil

ab kahan le ja ke baithen aise diwane ko ham

kya hui taqsir ham se to bata de ai nazir

take shadi marg samjhen aise mar jane ko ham