دعا میں ذکر کیوں ہو مدعا کا

دعا میں ذکر کیوں ہو مدعا کا

کہ یہ شیوہ نہیں اہل رضا کا

طلب میری بہت کچھ ہے، مگر کیا

کرم تیرا ہے اک دریا عطا کا

کہاں تک ناز اٹھائے آخر اے حسن

ہوس تیرے مزاج خود ستا کا

نہیں معلوم کیا اے شاہ خوباں

تجھے کچھ حال اپنے مبتلا کا

بجائے اسم اعظم آپ کا نام

وظیفہ ہے مرا صبح و مسا کا

غضب کا سامنا ہے عاشقوں کو

دیار حق میں افواج بلا کا

نثار ان پر ہوئے اچھے رہے ہم

تقاضا تھا یہی خوئے وفا کا

گنہ گارو چلو عفو الٰہی

بہت مشتاق ہے عرض خطا کا

تری محفل میں اہل دل کو جلوہ

نظر آ جائے گا شان خدا کا

اٹھایا ہے مزا دل نے بہت کچھ

محبت کے غم راحت فزا کا

جفا کو بھی وفا سمجھو کہ حسرتؔ

تمہیں حق ان سے کیا چون و چرا کا

dua mein zikr kyun ho muddaa ka

ke ye shewa nahin ahl-e-raza ka

talab meri bahut kuchh hai, magar kya

karam tera hai ik dariya ata ka

kahan tak naz uthae akhir ai husn

hawas tere mizaj-e-khud sata ka

nahin maalum kya ai shah-e-khuban

tujhe kuchh hal apne mubtala ka

bajae ism-e-aazam ap ka nam

wazifa hai mira subh-o-masa ka

ghazab ka samna hai ashiqon ko

dayar-e-haq mein afwaj bala ka

nisar un par hue achchhe rahe ham

taqaza tha yahi khu-e-wafa ka

gunah garo chalo afw-e-ilahi

bahut mushtaq hai arz-e-khata ka

tiri mahfil mein ahl-e-dil ko jalwa

nazar a jaega shan-e-khuda ka

uthaya hai maza dil ne bahut kuchh

mohabbat ke gham-e-rahat faza ka

jafa ko bhi wafa samjho ke hasrat

tumhen haq un se kya chun-o-chura ka