درد دل کی انہیں خبر نہ ہوئی

درد دل کی انہیں خبر نہ ہوئی

کوئی تدبیر کارگر نہ ہوئی

کوششیں ہم نے کیں ہزار مگر

عشق میں ایک معتبر نہ ہوئی

کر چکے ہم کو بے گناہ شہید

آپ کی آنکھ پھر بھی تر نہ ہوئی

نارسا آہ عاشقاں وہ کہاں

دور ان سے جو بے اثر نہ ہوئی

آئی بجھنے کو اپنی شمع حیات

شب غم کی مگر سحر نہ ہوئی

شب تھے ہم گرم نالہ ہائے فراق

صبح اک آہ سرد سر نہ ہوئی

تم سے کیونکر وہ چھپ سکے حسرتؔ

نگہ شوق پردہ در نہ ہوئی

dard-e-dil ki unhen khabar na hui

koi tadbir kargar na hui

koshishen ham ne kin hazar magar

ishq mein ek motabar na hui

kar chuke ham ko be gunah shahid

ap ki ankh phir bhi tar na hui

narasa ah ashiqan wo kahan

dur un se jo be asar na hui

ai bujhne ko apni sham-e-hayat

shab-e-gham ki magar sahar na hui

shab the ham garm nala ha-e-firaq

subh ik ah-e-sard sar na hui

tum se kyunkar wo chhup sake hasrat

nigah-e-shauq-e-parda dar na hui