دربار1911

دیکھ آئے ہم بھی دو دن رہ کے دہلی کی بہار

حکم حاکم سے ہوا تھا اجتماع انتشار

آدمی اور جانور اور گھر مزین اور مشین

پھول اور سبزہ چمک اور روشنی ریل اور تار

کراسن اور برق اور پٹرولیم اور تارپین

موٹر اور ایروپلین اور جمگھٹے اور اقتدار

مشرقی پتلوں میں تھی خدمت گزاری کی امنگ

مغربی شکلوں سے شان خود پسندی آشکار

شوکت و اقبال کے مرکز حضور امپرر

زینت و دولت کی دیوی امپرس عالی تبار

بحر ہستی لے رہا تھا بے دریغ انگڑائیاں

تھیمس کی امواج جمنا سے ہوئی تھیں ہم کنار

انقلاب دہر کے رنگین نقشے پیش تھے

تھی پئے اہل بصیرت باغ عبرت میں بہار

ذرے ویرانوں سے اٹھتے تھے تماشا دیکھنے

چشم حیرت بن گئی تھی گردش لیل و نہار

جامے سے باہر نگاہ ناز فتاحان ہند

حد قانونی کے اندر آنریبلوں کی قطار

خرچ کا ٹوٹل دلوں میں چٹکیاں لیتا ہوا

فکر ذاتی میں خیال قوم غائب فی المزار

دعوتیں انعام اسپیچیں قواعد فوج کمپ

عزتیں خوشیاں امیدیں احتیاطیں اعتبار

پیش رو شاہی تھی پھر ہز ہائینس پھر اہل جاہ

بعد اس کے شیخ صاحب ان کے پیچھے خاکسار

dekh ae ham bhi do din rah ke dehli ki bahar

hukm-e-hakim se hua tha ijtima-e-intishar

admi aur janwar aur ghar muzayyan aur mashin

phul aur sabza chamak aur raushni rel aur tar

karasun aur barq aur pitraulyam aur tarpin

motar aur iropilen aur jamghate aur iqtidar

mashriqi putlon mein thi khidmat guzari ki umang

maghribi shaklon se shan-e-khud pasandi ashkar

shaukat-o-iqbal ke markaz huzur-e-amprar

zinat-o-daulat ki dewi impiris ali tabar

bahr-e-hasti le raha tha be daregh angraiyan

thimis ki amwaj jamuna se hui thin ham kanar

inqilab-e-dahr ke rangin naqshe pesh the

thi piye ahl-e-basirat bagh-e-ibrat mein bahar

zarre wiranon se uthte the tamasha dekhne

chashm-e-hairat ban gai thi gardish-e-lail-o-nahar

jame se bahar nigah-e-naz fattahan-e-hind

had qanuni ke andar anrebilon ki qatar

kharch ka total dilon mein chutkiyan leta hua

fikr-e-zati mein khayal qaum ghaib fi alamzar

daawaten inam ispichen qawaid fauj-e-kamap

izzaten khushiyan ummiden ehtiyaten etibar

pesh ro shahi thi phir haz hainas phir ahl-e-jah

baad us ke shaikh sahab un ke pichhe khaksar