خواہشیں دنیا کی بار دوش و گردن ہو گئیں

خواہشیں دنیا کی بار دوش و گردن ہو گئیں

رفتہ رفتہ منزل عقبیٰ کی رہزن ہو گئیں

یہ ہوا کیسی چلی اس تنگنائے دہر میں

شہر جنگل ہو گئے آبادیاں بن ہو گئیں

چل سوئے گور غریباں اے حریص مال و زر

دیکھ کتنی آرزوئیں نذر مدفن ہو گئیں

کیسی رنگا رنگ شکلیں ہوں گی اے جوش بہار

مٹ کے جو گلگونۂ رخسار گلشن ہو گئیں

کھل نہیں سکتی کبھی کیفیت بغض و حسد

میری آہیں پردۂ ناموس دشمن ہو گئیں

میرے نغموں نے جو پائی قلب گلشن میں جگہ

شاخ گل پر بلبلیں بار نشیمن ہو گئیں

جب مرے نالے ہوئے قد صنوبر سے بلند

بلبلیں ساکت سر دیوار گلشن ہو گئیں

جامۂ ہستی ہوا صد چاک جب مثل سحر

زینتیں دنیا کی گردا گرد دامن ہو گئیں

khwahishen duniya ki bar-e-dosh-o-gardan ho gain

rafta rafta manzil-e-uqba ki rahzan ho gain

ye hua kaisi chali is tangnae dahr mein

shahr jangal ho gae abadiyan ban ho gain

chal su-e-gor-e-ghariban ai haris-e-mal-o-zar

dekh kitni arzuen nazr-e-madfan ho gain

kaisi ranga rang shaklen hongi ai josh-e-bahar

mit ke jo gulguna-e-rukhsar gulshan ho gain

khul nahin sakti kabhi kaifiyat-e-bughz-o-hasad

meri ahen parda-e-namus-e-dushman ho gain

mere naghmon ne jo pai qalb-e-gulshan mein jagah

shakh-e-gul par bulbulen bar-e-nasheman ho gain

jab mire nale hue qad-e-sanobar se buland

bulbulen sakit sar-e-diwar-e-gulshan ho gain

jama-e-hasti hua sad chak jab misl-e-sahar

zinaten duniya ki garda gard daman ho gain