خواب میں بھی نظر آ جائے جو گھر کی صورت

خواب میں بھی نظر آ جائے جو گھر کی صورت

پھاڑ کھائیں ترے درباں سگ در کی صورت

ایسی بگڑے نہ الٰہی کسی گھر کی صورت

وہی دیوار کی صورت ہے جو در کی صورت

پر شکستہ ہوں تہہ شاخ پڑا رہنے دے

باغباں تو مجھے ٹوٹے ہوئے پر کی صورت

چھوٹتا ہی نہیں اب عرش خدا بام بتاں

دیکھ لی ہے کہیں نالوں نے اثر کی صورت

گھیرے رہتا ہے بگولا مجھے اب ایک نہ ایک

کی ہے پیدا مرے صحرا نے بھی گھر کی صورت

جان جائے کہ رہے آپ کے آتے آتے

اور سے اور ہے اب درد جگر کی صورت

پانی ہو جاتے ہیں آنسو مرے موتی بن کر

ورنہ اچھی تو نہ تھی ان سے گہر کی صورت

کوچۂ زلف میں جاتے ہوئے دل ڈرتا ہے

ہر قدم پر ہے نئی خوف و خطر کی صورت

کبھی پھولا نہ پھلا نخل تمنا افسوس

پھول کی شکل نہ دیکھی نہ ثمر کی صورت

غیر کی قبر ہے گلشن ہے نہ دامن ان کا

مجھ سے دیکھی نہیں جاتی گل تر کی صورت

چارہ گر آتے ہیں تو آنکھ چرا جاتے ہیں

ایسی بگڑی ہے مرے زخم جگر کی صورت

آشیانے کو چلے باغ میں مدت گزری

پھرتی ہے آنکھ میں کیوں برق و شرر کی صورت

گھر سے بے فکر میں صحرا میں پھرا کرتا ہوں

میری آنکھوں میں پھرا کرتی ہے گھر کی صورت

قیس بھٹکا تھا کہ صحرا میں ریاضؔ آئے نظر

رہ نما اس کے بنے آپ خضر کی صورت

khwab mein bhi nazar a jae jo ghar ki surat

phar khaen tire darban sag-e-dar ki surat

aisi bigre na ilahi kisi ghar ki surat

wahi diwar ki surat hai jo dar ki surat

par shikasta hun tah-e-shakh para rahne de

baghban to mujhe tute hue par ki surat

chhutta hi nahin ab arsh-e-khuda bam-e-butan

dekh li hai kahin nalon ne asar ki surat

ghere rahta hai bagula mujhe ab ek na ek

ki hai paida mire sahra ne bhi ghar ki surat

jan jae ke rahe ap ke ate ate

aur se aur hai ab dard-e-jigar ki surat

pani ho jate hain ansu mire moti ban kar

warna achchhi to na thi un se guhar ki surat

kucha-e-zulf mein jate hue dil darta hai

har qadam par hai nai khauf-o-khatar ki surat

kabhi phula na phala nakhl-e-tamanna afsos

phul ki shakl na dekhi na samar ki surat

ghair ki qabr hai gulshan hai na daman un ka

mujh se dekhi nahin jati gul-e-tar ki surat

chara gar ate hain to ankh chura jate hain

aisi bigri hai mire zakhm-e-jigar ki surat

ashiyane ko chale bagh mein muddat guzri

phirti hai ankh mein kyun barq-o-sharar ki surat

ghar se be fikr mein sahra mein phira karta hun

meri ankhon mein phira karti hai ghar ki surat

qais bhatka tha ke sahra mein riyaz ae nazar

rah numa us ke bane ap khizar ki surat