حقیقت حسن

خدا سے حُسن نے اک روز یہ سوال کیا

جہاں میں کیوں نہ مجھے تُو نے لازوال کیا

مِلا جواب کہ تصویر خانہ ہے دنیا

شبِ درازِ عدم کا فسانہ ہے دنیا

ہوئی ہے رنگِ تغیّر سے جب نمود اس کی

وُہی حسیں ہے حقیقت زوال ہے جس کی

کہیں قریب تھا، یہ گُفتگو قمر نے سُنی

فلک پہ عام ہوئی، اخترِ سحر نے سُنی

سحَر نے تارے سے سُن کر سُنائی شبنم کو

فلک کی بات بتا دی زمیں کے محرم کو

بھر آئے پھُول کے آنسو پیامِ شبنم سے

کلی کا ننھّا سا دل خون ہو گیا غم سے

چمن سے روتا ہوا موسم بہار گیا

شباب سیر کو آیا تھا، سوگوار گیا

khuda se husn ne ik roz ye sawal kiya

jahan mein kyun na mujhe tu ne lazawal kiya

mila jawab ke taswir khana hai duniya

shab-e-daraz-e-adam ka fasana hai duniya

hui hai rang-e-taghayyur se jab numud us ki

wuhi hasin hai haqiqat zawal hai jis ki

kahin qarib tha, ye guftugu qamar ne suni

falak pe am hui, akhtar-e-sahar ne suni

sahar ne tare se sun kar sunai shabnam ko

falak ki bat bata di zamin ke mahram ko

bhar ae phul ke ansu payam-e-shabnam se

kali ka nanha sa dil khun ho gaya gham se

chaman se rota hua mausam-e-bahar gaya

shabab-e-sair ko aya tha, sogwar gaya