حلقے نہیں ہیں زلف کے حلقے ہیں جال کے

حلقے نہیں ہیں زلف کے حلقے ہیں جال کے

ہاں اے نگاہ شوق ذرا دیکھ بھال کے

پہنچے ہیں تا کمر جو ترے گیسوئے رسا

معنی یہ ہیں کمر بھی برابر ہے بال کے

بوس و کنار و وصل حسیناں ہے خوب شغل

کمتر بزرگ ہوں گے خلاف اس خیال کے

قامت سے تیرے صانع قدرت نے اے حسیں

دکھلا دیا ہے حشر کو سانچے میں ڈھال کے

شان دماغ عشق کے جلوے سے یہ بڑھی

رکھتا ہے ہوش بھی قدم اپنے سنبھال کے

زینت مقدمہ ہے مصیبت کا دہر میں

سب شمع کو جلاتے ہیں سانچے میں ڈھال کے

ہستی کے حق کے سامنے کیا اصل این و آں

پتلے یہ سب ہیں آپ کے وہم و خیال کے

تلوار لے کے اٹھتا ہے ہر طالب فروغ

دور فلک میں ہیں یہ اشارے ہلال کے

پیچیدہ زندگی کے کرو تم مقدمے

دکھلا ہی دے گی موت نتیجہ نکال کے

halqe nahin hain zulf ke halqe hain jal ke

han ai nigah-e-shauq zara dekh bhal ke

pahunche hain ta kamar jo tire gesu-e-rasa

maani ye hain kamar bhi barabar hai bal ke

bos-o-kanar-o-wasl hasinan hai khub shaghl

kamtar buzurg honge khilaf is khayal ke

qamat se tere sane-e-qudrat ne ai hasin

dikhla diya hai hashr ko sanche mein dhal ke

shan-e-dimagh-e-ishq ke jalwe se ye barhi

rakhta hai hosh bhi qadam apne sambhal ke

zinat muqaddima hai musibat ka dahr mein

sab shama ko jalate hain sanche mein dhal ke

hasti ke haq ke samne kya asl-e-ain-o-an

putle ye sab hain ap ke wahm-o-khayal ke

talwar le ke uthta hai har talib-e-farogh

daur-e-falak mein hain ye ishare hilal ke

pechida zindagi ke karo tum muqaddame

dikhla hi degi maut natija nikal ke