خوگر جور پہ تھوڑی سی جفا اور سہی

خوگر جور پہ تھوڑی سی جفا اور سہی

اس قدر ظلم پہ موقوف ہے کیا اور سہی

خوف غماز عدالت کا خطر دار کا ڈر

ہیں جہاں اتنے وہاں خوف خدا اور سہی

عہد اول کو بھی اچھا ہے جو پورا کر دو

تم وفادار ہو تھوڑی سی وفا اور سہی

جس نے ہنگامہ عدالت کا تری دیکھا ہے

اس گنہ گار کو اک روز جزا اور سہی

کشور کفر میں کعبہ کو بھی شامل کر لو

سیر ظلمات کو تھوڑی سی فضا اور سہی

بندگی میں تری سہتے ہی ہیں لو کی لپٹیں

چند دن کے لیے دوزخ کی ہوا اور سہی

دین و دل جا ہی چکا جان بھی جاتی ہے تو جائے

ترکش کفر میں اک تیر قضا اور سہی

رب عزت کے لیے بھی کوئی رہنے دو خطاب

تم خداوند ہی کہلاؤ خدا اور سہی

حکم حاکم نہ سہی مرگ مفاجات سے کم

مالک الملک پہ ایماں کی سزا اور سہی

ہم وفا کیشوں کا ایماں بھی ہے پروانہ صفت

شمع محفل جو وہ کافر نہ رہا اور سہی

khugar-e-jaur pe thori si jafa aur sahi

is qadar zulm pe mauquf hai kya aur sahi

khauf-e-ghammaz adalat ka khatar dar ka dar

hain jahan itne wahan khauf-e-khuda aur sahi

ahd-e-awwal ko bhi achchha hai jo pura kar do

tum wafadar ho thori si wafa aur sahi

jis ne hangama adalat ka tiri dekha hai

is gunah gar ko ik roz-e-jaza aur sahi

kishwar-e-kufr mein kaaba ko bhi shamil kar lo

sair-e-zulmat ko thori si faza aur sahi

bandagi mein tiri sahte hi hain lo ki lipten

chand din ke liye dozakh ki hawa aur sahi

din-o-dil ja hi chuka jan bhi jati hai to jae

tarkash-e-kufr mein ik tir-e-qaza aur sahi

rab-e-izzat ke liye bhi koi rahne do khitab

tum khudawand hi kahlao khuda aur sahi

hukm-e-hakim na sahi marg-e-mufajat se kam

malik almalik pe iman ki saza aur sahi

ham wafa keshon ka iman bhi hai parwana sifat

sham-e-mahfil jo wo kafir na raha aur sahi