جھولا

آیا ساون کا مہینہ نظر آیا جھولا

دل کو بھایا مری آنکھوں میں سمایا جھولا

سال بھر رہ کے بہشتوں کی فضا میں مہماں

ابر کی گود میں بیٹھا ہوا آیا جھولا

چولی دامن کا سا ہے ساتھ گھٹا کا اس کا

اس طرف آئی گھٹا اس طرف آیا جھولا

رت ہے جھولے کی نہ کیوں آج خدائی جھولے

ننھی کلیوں کو ہواؤں نے جھلایا جھولا

پینگ بڑھنے لگی آنچل کو گھٹا کے چھونے

باغ میں سکھیوں نے اس طرح جھلایا جھولا

جھومتی آتی ہیں مستانہ گھٹائیں کیسی

ڈھونڈ کر ہے انہیں کس دیس سے لایا جھولا

گیت سن سن کے گھٹائیں بھی بہک اٹھی ہیں

مل کے سکھیوں نے کچھ اس دھوم سے گایا جھولا

پھول ہلتے ہیں ادھر شاخ لچکتی ہے ادھر

یا بہاروں کو ہے قدرت نے جھلایا جھولا

دور پردیس میں ہم کس کو جھلائیں اخترؔ

حسرت و یاس کا پیغام ہے لایا جھولا

aya sawan ka mahina nazar aya jhula

dil ko bhaya miri ankhon mein samaya jhula

sal bhar rah ke bahishton ki faza mein mehman

abr ki god mein baitha hua aya jhula

choli daman ka sa hai sath ghata ka us ka

is taraf ai ghata is taraf aya jhula

rut hai jhule ki na kyun aj khudai jhule

nanhi kaliyon ko hawaon ne jhallaya jhula

ping barhne lagi anchal ko ghata ke chhune

bagh mein sakhiyon ne is tarah jhallaya jhula

jhumti ati hain mastana ghataen kaisi

dhund kar hai unhen kis des se laya jhula

git sun sun ke ghataen bhi bahak uthi hain

mil ke sakhiyon ne kuchh is dhum se gaya jhula

phul hilte hain idhar shakh lachakti hai idhar

ya baharon ko hai qudrat ne jhallaya jhula

dur pardes mein ham kis ko jhallaen akhtar

hasrat-o-yas ka paigham hai laya jhula