جگر سوختہ ہیں اور دل بریاں ہیں ہم

جگر سوختہ ہیں اور دل بریاں ہیں ہم

شعلہ کی طرح سدا دیدۂ گریاں ہیں ہم

متصل لخت جگر کرتے ہیں آنکھوں سے سدا

آہ کس عاشق غم دیدہ کی مژگاں ہیں ہم

کبھی ہنستے ہیں کبھی روتے ہیں جلتے ہیں کبھی

گل ہیں شبنم ہیں کہ یا آتش سوزاں ہیں ہم

ہم میں ہی عالم اکبر ہوئے گو جرم صغیر

مظہر جلوۂ حق حضرت انساں ہیں ہم

دہر پر شور ہے ہاتھوں سے ہمارے اے آہ

آفرینش میں مگر نالہ و افغاں ہیں ہم

فکر جمعیت دل ہم کو کہاں آہ حسنؔ

خاطر آشفتۂ گیسوئے پریشاں ہیں ہم

jigar sokhta hain aur dil buriyan hain ham

shola ki tarah sada dida-e-giryan hain ham

muttasil lakht-e-jigar karte hain ankhon se sada

ah kis ashiq-e-gham dida ki mizhgan hain ham

kabhi hanste hain kabhi rote hain jalte hain kabhi

gul hain shabnam hain ke ya atish-e-sozan hain ham

ham mein hi alam-e-akbar hue go jurm-e-saghir

mazhar-e-jalwa-e-haq hazrat-e-insan hain ham

dahr pur shor hai hathon se hamare ai ah

afrinish mein magar nala-o-afghan hain ham

fikr-e-jamiyyat-e-dil ham ko kahan ah husn

khatir ashufta-e-gesu-e-pareshan hain ham