جھوم کر بدلی اٹھی اور چھا گئی

جھوم کر بدلی اٹھی اور چھا گئی

ساری دنیا پر جوانی آ گئی

آہ وہ اس کی نگاہ مے فروش

جب بھی اٹھی مستیاں برسا گئی

گیسوئے مشکیں میں وہ روئے حسیں

ابر میں بجلی سی اک لہرا گئی

عالم مستی کی توبہ الاماں

پارسائی نشہ بن کر چھا گئی

آہ اس کی بے نیازی کی نظر

آرزو کیا پھول سی کمھلا گئی

ساز دل کو گدگدایا عشق نے

موت کو لے کر جوانی آ گئی

پارسائی کی جوانمرگی نہ پوچھ

توبہ کرنی تھی کہ بدلی چھا گئی

اخترؔ اس جان تمنا کی ادا

جب کبھی یاد آ گئی تڑپا گئی

jhum kar badli uthi aur chha gai

sari duniya par jawani a gai

ah wo us ki nigah-e-mai farosh

jab bhi uthi mastiyan barsa gai

gesu-e-mushkin mein wo ru-e-hasin

abr mein bijli si ik lahra gai

alam-e-masti ki tauba alaman

parsai nasha ban kar chha gai

ah us ki be niyazi ki nazar

arzu kya phul si kamhla gai

saz-e-dil ko gudgudaya ishq ne

maut ko le kar jawani a gai

parsai ki jawanmirgi na puchh

tauba karni thi ke badli chha gai

akhtar us jan-e-tamanna ki ada

jab kabhi yad a gai tarpa gai