جیے جائیں گے ہم بھی لب پہ دم جب تک نہیں آتا

جیے جائیں گے ہم بھی لب پہ دم جب تک نہیں آتا

ہمیں بھی دیکھنا ہے نامہ بر کب تک نہیں آتا

پہنچنا تھا جو عرض حال کو عرش معظم تک

کئی شب سے وہی نالہ مرے لب تک نہیں آتا

دل اپنا وادئ غربت میں شاید مر رہا جا کر

نہ آنے کی بھی اک میعاد ہے کب تک نہیں آتا

وہاں اوروں کے قصوں کو بھی سن کر وہ کھٹکتے ہیں

یہاں اپنی زباں پر حرف مطلب تک نہیں آتا

یہاں تک سینہ تنگی سے ضعیف و زار ہے نالہ

چلا جو صبح کو وہ تا بہ لب شب تک نہیں آتا

جہاں تمہید کی وہ اور قصے چھیڑ دیتا ہے

کسی صورت سے ظالم حرف مطلب تک نہیں آتا

بلا بھیجیں نہ جب تک شادؔ کو وہ اپنے کوچے میں

اجارہ ہے ترا اے شوق ہاں تب تک نہیں آتا

jiye jaenge ham bhi lab pe dam jab tak nahin ata

hamen bhi dekhna hai nama bar kab tak nahin ata

pahunchna tha jo arz-e-hal ko arsh-e-muazzam tak

kai shab se wahi nala mire lab tak nahin ata

dil apna wadi-e-ghurbat mein shayad mar raha ja kar

na ane ki bhi ik miad hai kab tak nahin ata

wahan auron ke qisson ko bhi sun kar wo khatakte hain

yahan apni zaban par harf-e-matlab tak nahin ata

yahan tak sina tangi se zaif-o-zar hai nala

chala jo subh ko wo ta ba lab shab tak nahin ata

jahan tamhid ki wo aur qisse chher deta hai

kisi surat se zalim harf-e-matlab tak nahin ata

bala bhejen na jab tak shad ko wo apne kuche mein

ijara hai tira ai shauq han tab tak nahin ata