آفتاب

اے آفتاب! رُوح و روانِ جہاں ہے تُو

شیرازہ بندِ دفترِ کون و مکاں ہے تُو

باعث ہے تُو وجود و عدم کی نمود کا

ہے سبز تیرے دم سے چمن ہست و بود کا

قائم یہ عُنصروں کا تماشا تجھی سے ہے

ہر شے میں زندگی کا تقاضا تجھی سے ہے

ہر شے کو تیری جلوہ گری سے ثبات ہے

تیرا یہ سوز و ساز سراپا حیات ہے

وہ آفتاب جس سے زمانے میں نور ہے

دل ہے، خرد ہے، روحِ رواں ہے، شعور ہے

اے آفتاب! ہم کو ضیائے شعور دے

چشمِ خرد کو اپنی تجلّی سے نور دے

ہے محفلِ وجود کا ساماں طراز تُو

یزدانِ ساکنانِ نشیب و فراز تُو

تیرا کمال ہستیِ ہر جاندار میں

تیری نمود سلسلۂ کوہسار میں

ہر چیز کی حیات کا پروردگار تُو

زائیدگانِ نُور کا ہے تاجدار تُو

نے ابتدا کوئی نہ کوئی انتہا تری

آزادِ قیدِ اوّل و آخر ضیا تری

ai aftab! ruh-o-rawan-e-jahan hai tu

shiraza band-e-daftar-e-kaun-o-makan hai tu

bais hai tu wajud-o-adam ki numud ka

hai sabz tere dam se chaman hast-o-bud ka

qaim ye unsaron ka tamasha tujhi se hai

har shai mein zindagi ka taqaza tujhi se hai

har shai ko teri jalwa giri se sabat hai

tera ye soz-o-saz sarapa hayat hai

wo aftab jis se zamane mein nur hai

dil hai, khirad hai, ruh-e-rawan hai, shuur hai

ai aftab! ham ko ziya-e-shuur de

chashm-e-khirad ko apni tajalli se nur de

hai mahfil-e-wajud ka saman taraz tu

yazdan-e-sakinan-e-nasheb-o-faraz tu

tera kamal-e-hasti-e-har jandar mein

teri numud silsila-e-kohsar mein

har chiz ki hayat ka parwardigar tu

zaidgan-e-nur ka hai tajdar tu

ne ibtida koi na koi intiha tiri

azad-e-qaid-e-awwal-o-akhir ziya tiri