حامد کہاں کہ دوڑ کے جاؤں خبر کو میں

حامد کہاں کہ دوڑ کے جاؤں خبر کو میں

کس آرزو پہ قطع کروں اس سفر کو میں

مانا بری خبر ہے پہ تیری خبر تو ہے

صبر و قرار نذر کروں نامہ بر کو میں

یہ سنگ و خشت آہ دلاتے ہیں تیری یاد

روتا ہوں دیکھ دیکھ کے دیوار و در کو میں

ہے تیری شکل یا تری آواز کا خیال

کرتا ہوں التفات یکایک جدھر کو میں

افسوس ہائے ہائے کی آتی نہیں صدا

پوچھے تو کیا بتاؤں ترے چارہ گر کو میں

کیا ہو گیا اسے کہ تجھے دیکھتی نہیں

جی چاہتا ہے آگ لگا دوں نظر کو میں

اچھا جو تو نے گوشۂ مرقد کیا پسند

اب اپنے حق میں گور بناؤں گا گھر کو میں

تیرے سر عزیز کی بالش ہو خاک سے

بالین غم سے اب نہ اٹھاؤں گا سر کو میں

دیکھی نہ تھی بہار ابھی تیرے شباب کی

بھولا نہ تھا ابھی ترے عہد صغر کو میں

تقدیر ہی نے ہائے نہ کی کچھ مساعدت

کیا روؤں اب دعا و دوا کے اثر کو میں

حکم خدا یہی تھا کہ بیٹھا کیا کروں

ماتم میں تیرے اشک فشاں چشم تر کو میں

جز درد و داغ تو نے نہ چھوڑا نشان حیف

رکھوں گا میہمان انہیں عمر بھر کو میں

کر نے دو آہ و نالہ کہ آخر رہوں گا بیٹھ

تسلیم کر کے حکم قضا و قدر کو میں

کیا فکر آب و نان کہ غم کہہ رہا ہے اب

موجود ہوں ضیافت دل اور جگر کو میں

تجھ کو جوار رحمت حق میں جگہ ملے

مانگا کروں گا اب یہ دعا ہر سحر کو میں

حبس دوام تو نہیں دنیا کہ مر رہوں

کاہے کو گھر خیال کروں رہ گزر کو میں

خود ہم سے بھی زیادہ ہو جو ہم پے مہرباں

وہ جام زہر دے تو نہ چکھوں شکر کو میں

وہ جانے اور اس کی رضا جو پسند ہو

سب کام سونپتا ہوں اسی داد گر کو میں

ہوتا نہ دل میں درد تو کرتا نہ ہائے ہائے

دیتا نہ طول یوں سخن مختصر کو میں

hamid kahan ke daur ke jaun khabar ko main

kis arzu pe qata karun is safar ko main

mana buri khabar hai pe teri khabar to hai

sabr-o-qarar nazr karun nama bar ko main

ye sang-o-khisht ah dilate hain teri yad

rota hun dekh dekh ke diwar-o-dar ko main

hai teri shakl ya tiri awaz ka khayal

karta hun iltifat yakayak jidhar ko main

afsos hae hae ki ati nahin sada

puchhe to kya bataun tire chara gar ko main

kya ho gaya use ke tujhe dekhti nahin

ji chahta hai ag laga dun nazar ko main

achchha jo tu ne gosha-e-marqad kiya pasand

ab apne haq mein gor banaunga ghar ko main

tere sar-e-aziz ki balish ho khak se

balen-e-gham se ab na uthaunga sar ko main

dekhi na thi bahar abhi tere shabab ki

bhula na tha abhi tire ahd-e-sighar ko main

taqdir hi ne hae na ki kuchh musaidat

kya roun ab dua-o-dawa ke asar ko main

hukm-e-khuda yahi tha ke baitha kya karun

matam mein tere ashk fishan chashm-e-tar ko main

juz dard-o-dagh tu ne na chhora nishan haif

rakhunga mehman unhen umr bhar ko main

kar ne do ah-o-nala ke akhir rahunga baith

taslim kar ke hukm-e-qaza-o-qadar ko main

kya fikr ab-o-nan ke gham kah raha hai ab

maujud hun ziyafat-e-dil aur jigar ko main

tujh ko jawar-e-rahmat-e-haq mein jagah mile

manga karunga ab ye dua har sahar ko main

habs-e-dawam to nahin duniya ke mar rahun

kahe ko ghar khayal karun rah guzar ko main

khud ham se bhi ziyada ho jo ham pe mehrban

wo jam zahr de to na chakhun shakar ko main

wo jane aur us ki raza jo pasand ho

sab kam saunpta hun isi dad gar ko main

hota na dil mein dard to karta na hae hae

deta na tul yun sukhan mukhtasar ko main