حائل تھی بیچ میں جو رضائی تمام شب

حائل تھی بیچ میں جو رضائی تمام شب

اس غم سے ہم کو نیند نہ آئی تمام شب

کی یاس سے ہوس نے لڑائی تمام شب

تم نے تو خوب راہ دکھائی تمام شب

پھر بھی تو ختم ہو نہ سکی آرزو کی بات

ہر چند ہم نے ان کو سنائی تمام شب

بے باک ملتے ہی جو ہوئے ہم تو شرم سے

آنکھ اس پری نے پھر نہ ملائی تمام شب

دل خوب جانتا ہے کہ تم کس خیال سے

کرتے رہے عدو کی برائی تمام شب

پھر شام ہی سے کیوں وہ چلے تھے چھڑا کے ہاتھ

دکھتی رہی جو ان کی کلائی تمام شب

حسرتؔ سے کچھ وہ آتے ہی ایسے ہوئے خفا

پھر ہو سکی نہ ان سے صفائی تمام شب

hail thi bich mein jo rizai tamam shab

is gham se ham ko nind na ai tamam shab

ki yas se hawas ne larai tamam shab

tum ne to khub rah dikhai tamam shab

phir bhi to khatm ho na saki arzu ki bat

har chand ham ne un ko sunai tamam shab

be bak milte hi jo hue ham to sharm se

ankh us pari ne phir na milai tamam shab

dil khub janta hai ke tum kis khayal se

karte rahe adu ki burai tamam shab

phir sham hi se kyun wo chale the chhura ke hath

dikhti rahi jo un ki kalai tamam shab

hasrat se kuchh wo ate hi aise hue khafa

phir ho saki na un se safai tamam shab