حرم کیا دیر کیا دونوں یہ ویراں ہوتے جاتے ہیں

حرم کیا دیر کیا دونوں یہ ویراں ہوتے جاتے ہیں

تمہارے معتقد گبرو مسلماں ہوتے جاتے ہیں

الگ سب سے نظر نیچی خرام آہستہ آہستہ

وہ مجھ کو دفن کر کے اب پشیماں ہوتے جاتے ہیں

سوا طفلی سے بھی ہیں بھولی باتیں اب جوانی میں

قیامت ہے کہ دن پر دن وہ ناداں ہوتے جاتے ہیں

کہاں سے لاؤں گا خون جگر ان کے کھلانے کو

ہزاروں طرح کے غم دل کے مہماں ہوتے جاتے ہیں

خرابی خانہ ہائے عیش کی ہے دور گردوں میں

جو باقی رہ گئے ہیں وہ بھی ویراں ہوتے جاتے ہیں

بیاں میں کیا کروں دل کھول کر شوق شہادت کو

ابھی سے آپ تو شمشیر عریاں ہوتے جاتے ہیں

غضب کی یاد میں عیاریاں واللہ تم کو بھی

غرض قائل تمہارے ہم تو اے جاں ہوتے جاتے ہیں

ادھر ہم سے بھی باتیں آپ کرتے ہیں لگاوٹ کی

ادھر غیروں سے بھی کچھ عہد و پیماں ہوتے جاتے ہیں

haram kya der kya donon ye wiran hote jate hain

tumhare motaqid gabro musalman hote jate hain

alag sab se nazar nichi khiram ahista ahista

wo mujh ko dafn kar ke ab pasheman hote jate hain

siwa tifli se bhi hain bhuli baten ab jawani mein

qayamat hai ke din par din wo nadan hote jate hain

kahan se launga khun-e-jigar un ke khilane ko

hazaron tarah ke gham dil ke mehman hote jate hain

kharabi khana ha-e-aish ki hai daur-e-gardun mein

jo baqi rah gae hain wo bhi wiran hote jate hain

bayan mein kya karun dil khol kar shauq-e-shahadat ko

abhi se ap to shamshir-e-uryan hote jate hain

ghazab ki yad mein ayyariyan wallah tum ko bhi

gharaz qail tumhare ham to ai jan hote jate hain

idhar ham se bhi baten ap karte hain lagawat ki

idhar ghairon se bhi kuchh ahd-o-paiman hote jate hain