حریف راز ہیں اے بے خبر در و دیوار

حریف راز ہیں اے بے خبر در و دیوار

کہ گوش رکھتے ہیں سب سر بہ سر در و دیوار

نوید مقدم فصل بہار سن سن کر

اڑیں گے شوق میں بے بال و پر در و دیوار

شب فراق میں گھر مجھ کو کاٹے کھاتا ہے

بنا ہے اک سگ دیوانہ ہر در و دیوار

تمہارے غم نے وہ صورت مری بنائی ہے

کہ رو رہے ہیں مرے حال پر در و دیوار

ہجوم رنج و قلق میں ظہیرؔ کیا کہئے

نہیں ہیں مونس خلوت مگر در و دیوار

harif-e-raz hain ai be khabar dar-o-diwar

ke gosh rakhte hain sab sar ba sar dar-o-diwar

nawed-e-maqdam fasl-e-bahar sun sun kar

urenge shauq mein be bal-o-par dar-o-diwar

shab-e-firaq mein ghar mujh ko kate khata hai

bana hai ik sag-e-diwana har dar-o-diwar

tumhare gham ne wo surat miri banai hai

ke ro rahe hain mire hal par dar-o-diwar

hujum-e-ranj-o-qalaq mein zahir kya kahiye

nahin hain munis khalwat magar dar-o-diwar