آج اپنے دل سے پھر الجھا ہوں میں

آج اپنے دل سے پھر الجھا ہوں میں

مدعا یہ ہے کہ دیکھوں کیا ہوں میں

روکنا اے مادیت کے حجاب

خود بخود افشا ہوا جاتا ہوں میں

ہے مری آنکھوں میں کیف بے خودی

خواب دوشیں سے ابھی جاگا ہوں میں

چاندنی راتوں میں جب اٹھتی ہے موج

نور بن کر چاند میں بہتا ہوں میں

کس قدر رنگین ہے میرا مزاج

صبح کے پھولوں کا گہوارہ ہوں میں

گلستاں میں چھیڑ کر غنچوں کے ساز

خود بخود اک گیت گا لیتا ہوں میں

جادۂ ہستی ہے اک راہ غلط

یہ کہاں گم ہو کے آ پہونچا ہوں میں

دور تک کوئی نہیں ہے ہم خیال

ایسے خواب آباد میں تنہا ہوں میں

کاروان زندگی آگے گیا

پر غبار اک صبح کا تارا ہوں میں

تنگ ہے مجھ پر فضائے کائنات

ذرے کی آغوش میں صحرا ہوں میں

زندگی کی بجھ گئیں شمعیں ضیاؔ

تیرگیٔ شب کا پروانہ ہوں میں

aj apne dil se phir uljha hun main

muddaa ye hai ke dekhun kya hun main

rokna ai madiyyat ke hijab

khud bakhud ifsha hua jata hun main

hai miri ankhon mein kaif-e-be khudi

khwab doshen se abhi jaga hun main

chandni raton mein jab uthti hai mauj

nur ban kar chand mein bahta hun main

kis qadar rangin hai mera mizaj

subh ke phulon ka gahwara hun main

gulsitan mein chher kar ghunchon ke saz

khud bakhud ik git ga leta hun main

jada-e-hasti hai ik rah-e-ghalat

ye kahan gum ho ke a pahuncha hun main

dur tak koi nahin hai ham khayal

aise khwab abad mein tanha hun main

karwan-e-zindagi age gaya

par ghubar ik subh ka tara hun main

tang hai mujh par faza-e-kainat

zarre ki aghosh mein sahra hun main

zindagi ki bujh gain shamen ziya

tirgi-e-shab ka parwana hun main