حسن کو شکلیں دکھانی آ گئیں

حسن کو شکلیں دکھانی آ گئیں

شوخیاں لے کر جوانی آ گئیں

سر میں سودا دل میں درد آنکھوں میں اشک

بستیاں ہم کو بسانی آ گئیں

جو بگڑ جاتا تھا باتوں پر کبھی

اب اسے باتیں بنانی آ گئیں

دل میں لاکھوں داغ روشن ہو گئے

عشق کو شمعیں جلانی آ گئیں

برق و باراں کے جلو میں بدلیاں

ساتھ لے کر آگ پانی آ گئیں

اے دل راحت طلب ہشیار باش

ساعتیں اب امتحانی آ گئیں

دل لگا کر پھنس گئے زحمت میں ہم

تھیں بلائیں جتنی آنی آ گئیں

مسکرا دینا قیامت ہو گیا

بجلیاں تم کو گرانی آ گئیں

ڈر رہے تھے جن سے ارباب جہاں

وہ بلائیں آسمانی آ گئیں

نوحؔ وہ کہتے ہیں پھر طوفان اٹھے

قوتیں اب آزمانی آ گئیں

husn ko shaklen dikhani a gain

shokhiyan le kar jawani a gain

sar mein sauda dil mein dard ankhon mein ashk

bastiyan ham ko basani a gain

jo bigar jata tha baton par kabhi

ab use baten banani a gain

dil mein lakhon dagh raushan ho gae

ishq ko shamen jalani a gain

barq-o-baran ke jilau mein badliyan

sath le kar ag pani a gain

ai dil-e-rahat talab hushyar bash

saaten ab imtihani a gain

dil laga kar phans gae zahmat mein ham

thin balaen jitni ani a gain

muskura dena qayamat ho gaya

bijliyan tum ko girani a gain

dar rahe the jin se arbab-e-jahan

wo balaen asmani a gain

nuh wo kahte hain phir tufan uthe

quwwaten ab azmani a gain