حسن کو سمجھتا ہے عشق ہم زباں اپنا

حسن کو سمجھتا ہے عشق ہم زباں اپنا

ہے حقیقت ایسی ہی یا ہے یہ گماں اپنا

فاش ہم کریں کیونکر راز مدعا یابی

گم حصول مقصد میں حاصل بیاں اپنا

کارساز ہے کتنی دید و باز دید اپنی

مل گیا صلہ ہم کو بعد امتحاں اپنا

لطف رنجش بے جا آج دونوں پاتے ہیں

مسکرا رہے ہیں وہ دل ہے شادماں اپنا

ان کی دل فریبی کا یہ جواب ہے ورنہ

مجھ سا بد گماں سمجھے ان کو مہرباں اپنا

کارواں کے بھی ملتے کچھ نشاں یہ نا ممکن

کچھ اثر تو چھوڑے گی یاد کارواں اپنا

درد آشنا دل کو دیکھ کر میں کہتا ہوں

یاس دے نہیں سکتی آس کو مکاں اپنا

بیکسی کی منزل سے جس کی حد نہیں ملتی

اس زمیں پہ کھینچیں ہم کس طرح نشاں اپنا

کیا علاج ہے منظورؔ اس جنوں خرامی کا

منفعل ہوں مجنوں کو کہہ کے ہم عناں اپنا

husn ko samajhta hai ishq ham zaban apna

hai haqiqat aisi hi ya hai ye guman apna

fash ham karen kyunkar raz-e-muddaa yabi

gum husul-e-maqsad mein hasil-e-bayan apna

karsaz hai kitni did-o-baz did apni

mil gaya sila ham ko baad imtihan apna

lutf ranjish-e-be ja aj donon pate hain

muskura rahe hain wo dil hai shadman apna

un ki dil farebi ka ye jawab hai warna

mujh sa bad guman samjhe un ko mehrban apna

karwan ke bhi milte kuchh nishan ye na mumkin

kuchh asar to chhoregi yad karwan apna

dard-e-ashna dil ko dekh kar main kahta hun

yas de nahin sakti as ko makan apna

bekasi ki manzil se jis ki had nahin milti

is zamin pe khinchen ham kis tarah nishan apna

kya ilaj hai manzur is junun khirami ka

munfail hun majnun ko kah ke ham inan apna