حصول آزادی کی دقتیں

ہند کا آزاد ہو جانا کوئی آساں نہیں

دیکھنا تم کو ابھی کیا کیا دکھایا جائے گا

دیکھنا تم سے ابھی کتنے کئے جائیں گے مکر

کس طرح تم کو ابھی چکر میں لایا جائے گا

تم میں ڈالا جائے گا اک سخت و نازک تفرقہ

تم کو شہ دے دے کے آپس میں لڑایا جائے گا

پیشوایان مذاہب کو ملیں گی رشوتیں

ڈھونگ تبلیغ اور شدھی کا رچایا جائے گا

دھرم رکشا کے لئے تم سے لئے جائیں گے عہد

تم کو مذہب اپنا خطرے میں دکھایا جائے گا

لیڈروں سے ہوں گے وعدے خلعت و انعام کے

قلت و کثرت کا ہنگامہ اٹھایا جائے گا

تم کو پروانہ عطا ہوگا خطاب و جاہ کا

تم کو عہدے دے کے لالچ میں پھنسایا جائے گا

گر یہ تدبیریں مقدر سے نہ راس آئیں تو پھر

دوسری صورت سے تم کو ڈگمگایا جائے گا

انتہائی بربریت سے لیا جائے گا کام

بند کر کے تم کو جیلوں میں سڑایا جائے گا

دانہ پانی کر دیا جائے گا بالکل تم پہ بند

تم کو بھوکوں مار کے قبضے میں لایا جائے گا

گرم لوہے سے تمہارے جسم داغے جائیں گے

تم کو کوڑے مار کر الو بنایا جائے گا

جائیدادیں سب تمہاری ضبط کر لی جائیں گی

بال بچوں پر تمہارے ظلم ڈھایا جائے گا

باوجود اس کے بھی تم قائم رہے ضد پر اگر

بے تأمل تم کو پھانسی پر چڑھایا جائے گا

اس طرح بھی تم اگر لائے نہ ابرو پر شکن

سر تمہارے پاؤں پر آخر جھکایا جائے گا

hind ka azad ho jana koi asan nahin

dekhna tum ko abhi kya kya dikhaya jaega

dekhna tum se abhi kitne kiye jaenge makr

kis tarah tum ko abhi chakkar mein laya jaega

tum mein dala jaega ik sakht-o-nazuk tafriqa

tum ko shah de de ke apas mein laraya jaega

peshwayan mazahib ko milengi rishwaten

dhong tabligh aur shuddhi ka rachaya jaega

dharm raksha ke liye tum se liye jaenge ahd

tum ko mazhab apna khatre mein dikhaya jaega

lidaron se honge waade khilat-o-inam ke

qillat-o-kasrat ka hangama uthaya jaega

tum ko parwana ata hoga khitab-o-jah ka

tum ko ohde de ke lalach mein phansaya jaega

gar ye tadbiren muqaddar se na ras aen to phir

dusri surat se tum ko dagmagaya jaega

intihai barbariyyat se liya jaega kam

band kar ke tum ko jelon mein saraya jaega

dana pani kar diya jaega bilkul tum pe band

tum ko bhukon mar ke qabze mein laya jaega

garm lohe se tumhare jism daghe jaenge

tum ko kore mar kar ullu banaya jaega

jaidaden sab tumhari zabt kar li jaengi

bal bachchon par tumhare zulm dhaya jaega

bawajud us ke bhi tum qaim rahe zid par agar

be tamal tum ko phansi par charhaya jaega

is tarah bhi tum agar lae na abru par shikan

sar tumhare paon par akhir jhukaya jaega