حسن پر زیبا نہیں یہ لن ترانی آپ کی

حسن پر زیبا نہیں یہ لن ترانی آپ کی

چار دن کی چاندنی ہے نوجوانی آپ کی

ہم بھی کچھ منہ سے جو کہہ بیٹھیں تو پھر کتنی رہے

دیکھیے اچھی نہیں یہ بد زبانی آپ کی

کچھ سمجھ میں حال یہ آتا نہیں حیران ہوں

آج ہے کیسی یہ مجھ پر مہربانی آپ کی

باز آئے ہم یہ اپنا آپ چھلا لیجیے

ہر کسی کے ہاتھ میں ہے اب نشانی آپ کی

راہ میں بھی دیکھ کر منہ پھیر لیتے ہیں حضور

آج کل ہے کس قدر نامہربانی آپ کی

دو گھڑی اک رنگ پر قائم نہیں حسن شباب

کیا مصور کھینچے تصویر جوانی آپ کی

آب حیواں ہے کہیں زہر ہلاہل ہے کہیں

تلخ گوئی آپ کی شیری زبانی آپ کی

خواب میں ہم کو نہ آنے دیتے تو ہم جانتے

کی رقیبوں نے یہ کیسی پاسبانی آپ کی

اپنے مرنے کا نہیں غم رنج ہے اس بات کا

آج انگلی سے اترتی ہے نشانی آپ کی

حال دل سنتے نہیں یہ کہہ کے خوش کر دیتے ہیں

پھر کبھی فرصت میں سن لیں گے کہانی آپ کی

ہم کو یہ دولت کبھی ملتی تو ہم بھی جانتے

ہوگی جس کے واسطے ہوگی جوانی آپ کی

husn par zeba nahin ye lan tarani ap ki

char din ki chandni hai naujawani ap ki

ham bhi kuchh munh se jo kah baithen to phir kitni rahe

dekhiye achchhi nahin ye bad zabani ap ki

kuchh samajh mein hal ye ata nahin hairan hun

aj hai kaisi ye mujh par mehrbani ap ki

baz ae ham ye apna ap chhila lijiye

har kisi ke hath mein hai ab nishani ap ki

rah mein bhi dekh kar munh pher lete hain huzur

aj kal hai kis qadar namehrbani ap ki

do ghari ik rang par qaim nahin husn-e-shabab

kya musawwir khinche taswir-e-jawani ap ki

ab-e-haiwan hai kahin zahr-e-halahal hai kahin

talkh goi ap ki sheri zabani ap ki

khwab mein ham ko na ane dete to ham jante

ki raqibon ne ye kaisi pasbani ap ki

apne marne ka nahin gham ranj hai is bat ka

aj ungli se utarti hai nishani ap ki

hal-e-dil sunte nahin ye kah ke khush kar dete hain

phir kabhi fursat mein sun lenge kahani ap ki

ham ko ye daulat kabhi milti to ham bhi jante

hogi jis ke waste hogi jawani ap ki