حضرت عشق ادھر کیجے کرم یا معبود

حضرت عشق ادھر کیجے کرم یا معبود

بال گوپال ہیں یاں آپ کے ہم یا معبود

بندہ خانہ میں اجی لائیے تشریف شریف

آ کے رکھ دیجے ان آنکھوں پہ قدم یا معبود

نفی اثبات کی شاغل جو قلندر ہیں سو وہ

اپنی گردن کو نہیں کرتے ہیں خم یا معبود

اپنے داتا کی حقیقت کے ہیں جلوہ تم میں

لمعۂ نور تجلی کی قسم یا معبود

جلد پھٹکارئے سبزے کے نشہ کو کوڑا

کھینچیے اور کوئی سلفے کا دم یا معبود

آپ ہی آپ ہیں وہ آپ نے سچ فرمایا

یوں بھی کچھ دھوکے سے تھے نام کو ہم یا معبود

ورنہ یہ عاریتاً ہے جو وجود اپنا سو

گزراں وہ تو ہے جوں موجۂ یم یا معبود

واقعی بولنے سے اپنے لڑا بیٹھے جو آنکھ

کیوں خودی سے نہ کرے پھیر وہ رم یا معبود

آنکھ کو کہتے عرب عین ہیں سو عین اگر

دم پر آ جائے تو ہو عین عدم یا معبود

رات تریاک نشہ نے تو الٹ ڈالا واہ

کوئی گھولا تو وہ تھا کاسۂ سم یا معبود

سدرہ تک آن تو پہونچا ہوں دلی قصد ہے یہ

کہ بڑھوں اور بھی دو چار قدم یا معبود

چار زانو ہو اب انشاؔ بھی زمیں سے اونچا

یک و جب رہنے لگا سادہ کی دم یا معبود

hazrat-e-ishq idhar kije karam ya maabud

bal gopal hain yan ap ke ham ya maabud

banda khana mein aji laiye tashrif-e-sharif

a ke rakh dije in ankhon pe qadam ya maabud

nafi isbat ki shaghul jo qalandar hain so wo

apni gardan ko nahin karte hain kham ya maabud

apne data ki haqiqat ke hain jalwa tum mein

lamaa-e-nur-e-tajalli ki qasam ya maabud

jald phatakariye sabze ke nasha ko kora

khinchiye aur koi sulfe ka dam ya maabud

ap hi ap hain wo ap ne sach farmaya

yun bhi kuchh dhoke se the nam ko ham ya maabud

warna ye ariyatan hai jo wajud apna su

guzran wo to hai jun mauja-e-yam ya maabud

waqai bolne se apne lara baithe jo ankh

kyun khudi se na kare pher wo ram ya maabud

ankh ko kahte arab ain hain so ain agar

dam par a jae to ho ain adam ya maabud

rat tiryak nasha ne to ulat dala wah

koi ghola to wo tha kasa-e-sam ya maabud

sidra tak an to pahuncha hun dili qasd hai ye

ke barhun aur bhi do char qadam ya maabud

char zanu ho ab insha bhi zamin se uncha

yak-o-jab rahne laga sada ki dam ya maabud