جفا پر جان دیتے ہیں ستم پر تیرے مرتے ہیں

جفا پر جان دیتے ہیں ستم پر تیرے مرتے ہیں

یہ ناکام محبت سچ تو یہ ہے کام کرتے ہیں

کہیں کیا ہم پہ جو صدمہ گزرتے ہیں گزرتے ہیں

لگایا جس گھڑی دل اس گھڑی کو یاد کرتے ہیں

تماشہ جب سے دیکھا ہے مرے دل کے تڑپنے کا

تماشہ ہے کہ وہ اپنی نظر سے آپ ڈرتے ہیں

نہیں آتے نہ آئیں وہ گئے تاب و تواں جائیں

تجھی پر آج ہم اے بے قراری صبر کرتے ہیں

گلی کوچوں میں تم نے اشتہار عشق پھیلائے

کہ اڑاڑ کر مرے مکتوب کے پرزے بکھرتے ہیں

ادا بے ساختہ ان گیسوؤں کی کچھ نرالی ہے

بنائے سے بگڑتے ہیں سنوارے سے بکھرتے ہیں

نہ پوچھو داغؔ ہم سے انتظار یار کی صورت

یہ آنکھیں جانتی ہیں خوب جو نقشے گزرتے ہیں

jafa par jan dete hain sitam par tere marte hain

ye nakam-e-mohabbat sach to ye hai kam karte hain

kahen kya ham pe jo sadma guzarte hain guzarte hain

lagaya jis ghari dil us ghari ko yad karte hain

tamasha jab se dekha hai mire dil ke tarapne ka

tamasha hai ke wo apni nazar se ap darte hain

nahin ate na aen wo gae tab-o-tawan jaen

tujhi par aj ham ai be qarari sabr karte hain

gali kuchon mein tum ne ishtihar-e-ishq phailae

ke urur kar mire maktub ke purze bikharte hain

ada be sakhta un gesuon ki kuchh nirali hai

banae se bigarte hain sanware se bikharte hain

na puchho dagh ham se intizar-e-yar ki surat

ye ankhen janti hain khub jo naqshe guzarte hain