جفا میں نام نکالو نہ آسماں کی طرح

جفا میں نام نکالو نہ آسماں کی طرح

کھلیں گی لاکھ زبانیں مری زباں کی طرح

فریب اثر کو کوئی دے مری فغاں کی طرح

تراشتی ہے یہ فقرے تری زباں کی طرح

یہ کس کی سایۂ دیوار نے مجھے پیسا

یہ کون ٹوٹ پڑا مجھ پہ آسماں کی طرح

ضرور ڈھائیں گے آفت کچھ ان کے ناوک ناز

چڑھے ہیں گوشہ ابرو کڑی کماں کی طرح

رہ حیات کٹی اس طرح کہ اٹھ اٹھ کر

میں بیٹھ بیٹھ گیا گرد کارواں کی طرح

برنگ طائر بو میں ہوں غنچہ و گل ہیں

مرے قفس کی طرح میرے آشیاں کی طرح

نہ تیرے در سے ہٹے تیری ٹھوکریں کھا کر

وہیں جمے رہے ہم سنگ آستاں کی طرح

ہمیں ہے گھر سے تعلق اب اس قدر باقی

کبھی جو آئے تو دو دن کو مہمان کی طرح

گیا چمن کو تو جھک کر بہت ملیں شاخیں

لیا گلوں نے مجھے میرے آشیاں کی طرح

بلا ہے یہ کوئی تھوڑا نہ جانے پیکاں کو

لہو پیے گا ہمارا غم نہاں کی طرح

ذرا سی جان کو لاکھوں طرح کے کھٹکے ہیں

چمن نہ لائے کہیں رنگ آسماں کی طرح

میں آؤں آپ کے گھر کیا مجھے ڈراتے ہیں

عدو کے نقش قدم چشم پاسباں کی طرح

شریک درد تو کیا باعث اذیت ہیں

وہ لوگ جن سے تعلق تھا جسم و جاں کی طرح

تمہیں بھی دے گی مزا کچھ مری مصیبت عشق

کہیں کہیں سے سنو اس کو داستاں کی طرح

رہے کبھی نہ الٰہی مرا قفس خالی

کہ مجھ کو چین ملا اس میں آشیاں کی طرح

مجھے شباب نے مارا بلائے جاں ہو کر

بہار آئی مرے باغ میں خزاں کی طرح

قفس میں لوٹ لئے کون سے مزے میں نے

دکھائے آنکھ نے صیاد باغباں کی طرح

کسی کو چین نہ قاتل کی شوخیوں سے ملا

مرے ہوئے بھی تڑپتے ہیں نیم جاں کی طرح

تری اٹھان ترقی کرے قیامت کی

ترا شباب بڑھے عمر جاوداں کی طرح

جو اپنے گھر کوئی آ لے تو کون دے تکلیف

ستارے کون وہ بیٹھے ہیں مہماں کی طرح

ریاضؔ موت ہے اس شرط سے ہمیں منظور

زمیں ستائے نہ مرنے پر آسماں کی طرح

jafa mein nam nikalo na asman ki tarah

khulengi lakh zabanen miri zaban ki tarah

fareb-e-asar ko koi de miri fughan ki tarah

tarashti hai ye fiqre tiri zaban ki tarah

ye kis ki saya-e-diwar ne mujhe pisa

ye kaun tut para mujh pe asman ki tarah

zarur dhaenge afat kuchh un ke nawak-e-naz

charhe hain gosha-e-abru kari kaman ki tarah

rah-e-hayat kati is tarah ke uth uth kar

main baith baith gaya gard-e-karwan ki tarah

barang tair-e-bu mein hun ghuncha-o-gul hain

mire qafas ki tarah mere ashiyan ki tarah

na tere dar se hate teri thokaren kha kar

wahin jame rahe ham sang-e-astan ki tarah

hamen hai ghar se taalluq ab is qadar baqi

kabhi jo ae to do din ko mehman ki tarah

gaya chaman ko to jhuk kar bahut milen shakhen

liya gulon ne mujhe mere ashiyan ki tarah

bala hai ye koi thora na jane paikan ko

lahu piye ga hamara gham-e-nihan ki tarah

zara si jan ko lakhon tarah ke khatke hain

chaman na lae kahin rang-e-asman ki tarah

main aun ap ke ghar kya mujhe darate hain

adu ke naqsh-e-qadam chashm-e-pasban ki tarah

sharik-e-dard to kya bais-e-aziyyat hain

wo log jin se taalluq tha jism-o-jan ki tarah

tumhen bhi degi maza kuchh miri musibat ishq

kahin kahin se suno us ko dastan ki tarah

rahe kabhi na ilahi mira qafas khali

ke mujh ko chain mila is mein ashiyan ki tarah

mujhe shabab ne mara bulae jan ho kar

bahar ai mire bagh mein khizan ki tarah

qafas mein laut liye kaun se maze main ne

dikhae ankh ne sayyad baghban ki tarah

kisi ko chain na qatil ki shokhiyon se mila

mire hue bhi tarapte hain nim jan ki tarah

tiri uthan taraqqi kare qayamat ki

tira shabab barhe umr-e-jawedan ki tarah

jo apne ghar koi a le tu kaun de taklif

sitare kaun wo baithe hain mehman ki tarah

riyaz maut hai is shart se hamen manzur

zamin satae na marne par asman ki tarah