جلوۂ دربار دہلی

سر میں شوق کا سودا دیکھا

دہلی کو ہم نے بھی جا دیکھا

جو کچھ دیکھا اچھا دیکھا

کیا بتلائیں کیا کیا دیکھا

جمنا جی کے پاٹ کو دیکھا

اچھے ستھرے گھاٹ کو دیکھا

سب سے اونچے لاٹ کو دیکھا

حضرت ڈیوک کناٹؔ کو دیکھا

پلٹن اور رسالے دیکھے

گورے دیکھے کالے دیکھے

سنگینیں اور بھالے دیکھے

بینڈ بجانے والے دیکھے

خیموں کا اک جنگل دیکھا

اس جنگل میں منگل دیکھا

برھما اور ورنگل دیکھا

عزت خواہوں کا دنگل دیکھا

سڑکیں تھیں ہر کمپ سے جاری

پانی تھا ہر پمپ سے جاری

نور کی موجیں لیمپ سے جاری

تیزی تھی ہر جمپ سے جاری

ڈالی میں نارنگی دیکھی

محفل میں سارنگی دیکھی

بیرنگی بارنگی دیکھی

دہر کی رنگا رنگی دیکھی

اچھے اچھوں کو بھٹکا دیکھا

بھیڑ میں کھاتے جھٹکا دیکھا

منہ کو اگرچہ لٹکا دیکھا

دل دربار سے اٹکا دیکھا

ہاتھی دیکھے بھاری بھرکم

ان کا چلنا کم کم تھم تھم

زریں جھولیں نور کا عالم

میلوں تک وہ چم چم چم چم

پر تھا پہلوئے مسجد جامع

روشنیاں تھیں ہر سو لامع

کوئی نہیں تھا کسی کا سامع

سب کے سب تھے دید کے طامع

سرخی سڑک پر کٹتی دیکھی

سانس بھی بھیڑ میں گھٹتی دیکھی

آتش بازی چھٹتی دیکھی

لطف کی دولت لٹتی دیکھی

چوکی اک چولکھی دیکھی

خوب ہی چکھی پکھی دیکھی

ہر سو نعمت رکھی دیکھی

شہد اور دودھ کی مکھی دیکھی

ایک کا حصہ من و سلویٰ

ایک کا حصہ تھوڑا حلوا

ایک کا حصہ بھیڑ اور بلوا

میرا حصہ دور کا جلوا

اوج بریش راجا دیکھا

پرتو تخت و تاج کا دیکھا

رنگ زمانہ آج کا دیکھا

رخ کرزن مہراج کا دیکھا

پہنچے پھاند کے سات سمندر

تحت میں ان کے بیسوں بندر

حکمت و دانش ان کے اندر

اپنی جگہ ہر ایک سکندر

اوج بخت ملاقی ان کا

چرخ ہفت طبقاقی ان کا

محفل ان کی ساقی ان کا

آنکھیں میری باقی ان کا

ہم تو ان کے خیر طلب ہیں

ہم کیا ایسے ہی سب کے سب ہیں

ان کے راج کے عمدہ ڈھب ہیں

سب سامان عیش و طرب ہیں

اگزبشن کی شان انوکھی

ہر شے عمدہ ہر شے چوکھی

اقلیدس کی ناپی جوکھی

من بھر سونے کی لاگت سوکھی

جشن عظیم اس سال ہوا ہے

شاہی فورٹ میں بال ہوا ہے

روشن ہر اک ہال ہوا ہے

قصۂ ماضی حال ہوا ہے

ہے مشہور کوچہ و برزن

بال میں ناچیں لیڈی کرزن

طائر ہوش تھے سب کے لرزن

رشک سے دیکھ رہی تھی ہر زن

ہال میں چمکیں آ کے یکا یک

زریں تھی پوشاک جھکا جھک

محو تھا ان کا اوج سما تک

چرخ پہ زہرہ ان کی تھی گاہک

گو رقاصۂ اوج فلک تھی

اس میں کہاں یہ نوک پلک تھی

اندر کی محفل کی جھلک تھی

بزم عشرت صبح تلک تھی

کی ہے یہ بندش ذہن رسا نے

کوئی مانے خواہ نہ مانے

سنتے ہیں ہم تو یہ افسانے

جس نے دیکھا ہو وہ جانے

sar mein shauq ka sauda dekha

dehli ko ham ne bhi ja dekha

jo kuchh dekha achchha dekha

kya batlaen kya kya dekha

jamuna ji ke pat ko dekha

achchhe suthre ghat ko dekha

sab se unche lat ko dekha

hazrat diyuk kinat ko dekha

paltan aur risale dekhe

gore dekhe kale dekhe

sanginen aur bhale dekhe

baind bajane wale dekhe

khemon ka ik jangal dekha

is jangal mein mangal dekha

barhma aur warangul dekha

izzat khwahon ka dangal dekha

sarken thin har kamap se jari

pani tha har pamp se jari

nur ki maujen laimp se jari

tezi thi har jamp se jari

dali mein narangi dekhi

mahfil mein sarangi dekhi

bairangi barangi dekhi

dahr ki ranga rangi dekhi

achchhe achchhon ko bhatka dekha

bhir mein khate jhatka dekha

munh ko agarche latka dekha

dil darbar se atka dekha

hathi dekhe bhari bharkam

un ka chalna kam kam tham tham

zarrin jhulen nur ka alam

mailon tak wo cham cham cham cham

par tha pahlu-e-masjid jame

raushniyan thin har su lamaa

koi nahin tha kisi ka same

sab ke sab the did ke tame

surkhi sarak par katti dekhi

sans bhi bhir mein ghatti dekhi

atish bazi chhutti dekhi

lutf ki daulat lutti dekhi

chauki ik chaulakkhi dekhi

khub hi chakhi pakhi dekhi

har su nemat rakhi dekhi

shahd aur dudh ki makkhi dekhi

ek ka hissa man-o-salwa

ek ka hissa thora halwa

ek ka hissa bhir aur balwa

mera hissa dur ka jalwa

auj-e-baresh raja dekha

partau takht-o-taj ka dekha

rang-e-zamana aj ka dekha

rukh karzan mahraj ka dekha

pahunche phand ke sat samundar

taht mein un ke bison bandar

hikmat-o-danish un ke andar

apni jagah har ek sikandar

auj-e-bakht-e-mulaqi un ka

charkh-e-haft tibqaqi un ka

mahfil un ki saqi un ka

ankhen meri baqi un ka

ham to un ke khair talab hain

ham kya aise hi sab ke sab hain

un ke raj ke umda dhab hain

sab saman-e-aish-o-tarab hain

agzbshan ki shan anokhi

har shai umda har shai chaukhi

uqlaidis ki napi jokhi

man bhar sone ki lagat sukhi

jashn-e-azim is sal hua hai

shahi fort mein bal hua hai

raushan har ik hal hua hai

qissa-e-mazi hal hua hai

hai mashhur kucha-o-barzan

bal mein nachen ledi karzan

tair hosh the sab ke larzan

rashk se dekh rahi thi har zan

hal mein chamken a ke yaka yak

zarrin thi poshak jhuka jhuk

mahw tha un ka auj sama tak

charkh pe zohra un ki thi gahak

go raqqasa-e-auj-e-falak thi

is mein kahan ye nok-e-palak thi

andar ki mahfil ki jhalak thi

bazm-e-ishrat subh talak thi

ki hai ye bandish zehn-e-rasa ne

koi mane khwah na mane

sunte hain ham to ye afsane

jis ne dekha ho wo jane