جلوہ عیاں ہے قدرت پروردگار کا

جلوہ عیاں ہے قدرت پروردگار کا

کیا دل کشا یہ سین ہے فصل بہار کا

نازاں ہیں جوش حسن پہ گل ہائے دل فریب

جوبن دکھا رہا ہے یہ عالم ابھار کا

ہیں دیدنی بنفشہ و سنبل کے پیچ و تاب

نقشہ کھینچا ہوا ہے خط و زلف یار کا

سبزہ ہے یا یہ آب زمرد کی موج ہے

شبنم ہے بحر یا گہر آبدار کا

مرغان باغ زمزمہ سنجی میں محو ہیں

اور ناچ ہو رہا ہے نسیم بہار کا

پرواز میں ہیں تیتریاں شاد و چست و مست

زیب بدن کیے ہوئے خلعت بہار کا

موج ہوا و زمزمۂ عندلیب مست

اک ساز دلنواز ہے مضراب و تار کا

ابر تنک نے رونق موسم بڑھائی ہے

غازہ بنا ہے روئے عروس بہار کا

افسوس اس سماں میں بھی اکبرؔ اداس ہے

سوہان روح ہجر ہے اک گل عذار کا

jalwa ayan hai qudrat-e-parwardigar ka

kya dil kusha ye sain hai fasl-e-bahar ka

nazan hain josh-e-husn pe gul ha-e-dil fareb

joban dikha raha hai ye alam ubhar ka

hain didani banafsha-o-sumbul ke pech-o-tab

naqsha khincha hua hai khat-o-zulf-e-yar ka

sabza hai ya ye ab zamurrad ki mauj hai

shabnam hai bahr ya guhar-e-abdar ka

murghan-e-bagh-e-zamzama sanji mein mahw hain

aur nach ho raha hai nasim-e-bahar ka

parwaz mein hain titriyan shad-o-chust-o-mast

zeb-e-badan kiye hue khilat bahar ka

mauj hua-o-zamzama-e-andalib mast

ik saz dilnawaz hai mizrab-o-tar ka

abr-e-tunuk ne raunaq-e-mausam barhai hai

ghaza bana hai ru-e-urus-e-bahar ka

afsos is saman mein bhi akbar udas hai

sohan ruh-e-hijr hai ik gul izar ka