تیرے کوچے میں جو ہم با دیدہ تر بیٹھتے

تیرے کوچے میں جو ہم با دیدہ تر بیٹھتے

جوش طوفاں سے زمیں میں سینکڑوں گھر بیٹھتے

چارہ گر بھی ہم نشیں تھا رات کو ناصح بھی تھا

ورنہ بیتابی سے ہم کیا جانے کیا کر بیٹھتے

ہو گئی محفل تری کیا بے ادب بے قاعدہ

جو کھڑے رہتے تھے وہ اب ہیں برابر بیٹھتے

جب کیا شکوہ کہ محفل میں رہے ہم تم سے دور

اس نے جھنجھلا کر کہا کیا میرے سر پر بیٹھتے

جس کی قسمت میں ہو گردش کس طرح بیٹھے کہیں

ہم سے آوارہ ترے کوچے میں کیوں کر بیٹھتے

داغؔ تم نے کیوں کیا ہے نام وحشت کا خراب

اس سے تو بہتر یہی تھا چین سے گھر بیٹھتے

tere kuche mein jo ham ba dida tar baithte

josh-e-tufan se zamin mein sainkron ghar baithte

chara gar bhi ham nashin tha rat ko naseh bhi tha

warna betabi se ham kya jane kya kar baithte

ho gai mahfil tiri kya be adab be qaida

jo khare rahte the wo ab hain barabar baithte

jab kiya shikwa ke mahfil mein rahe ham tum se dur

us ne jhanjhla kar kaha kya mere sar par baithte

jis ki qismat mein ho gardish kis tarah baithe kahin

ham se awara tire kuche mein kyun kar baithte

dagh tum ne kyun kiya hai nam wahshat ka kharab

us se to behtar yahi tha chain se ghar baithte