تیرے کوچہ سے نہ یہ شیفتگاں جاتے ہیں

تیرے کوچہ سے نہ یہ شیفتگاں جاتے ہیں

جھوٹ کہتے ہیں کہ جاتے ہیں کہاں جاتے ہیں

آمد و رفت نہ پوچھ اپنی گلی کی ہم سے

آتے ہیں ہنستے ہوئے کرتے فغاں جاتے ہیں

کعبہ و دیر میں دیکھے ہیں اسی کا جلوہ

کفر و اسلام میں کب دیدہ وراں جاتے ہیں

نہیں مقدور کہ پہنچے کوئی اس تک پر ہم

جوں نگہ دیدۂ مردم سے نہاں جاتے ہیں

گر ہے دیدار طلب صاف کر اپنے دل کو

روبرو اس کے تو آئینہ دلاں جاتے ہیں

جذب تیرا ہی اگر کھینچے تو پہنچیں ورنہ

تجھ کو سنتے ہیں پرے واں سے جہاں جاتے ہیں

آہ کرتا ہے خراش ان کا دلوں میں نالہ

کون یہ قافلہ میں نالہ زناں جاتے ہیں

جی میں ہے کہئے غزل اور مقابل اس کے

گہر اس بحر میں مضموں کے رواں جاتے ہیں

تجھ کو بیدارؔ رکھا پیچھے گراں باری نے

راہ رو جو ہیں سبک سار دواں جاتے ہیں

tere kucha se na ye sheftagan jate hain

jhut kahte hain ke jate hain kahan jate hain

amad-o-raft na puchh apni gali ki ham se

ate hain hanste hue karte fughan jate hain

kaaba-o-dair mein dekhe hain usi ka jalwa

kufr-o-islam mein kab dida waran jate hain

nahin maqdur ke pahunche koi us tak par ham

jun nigah dida-e-mardum se nihan jate hain

gar hai didar talab saf kar apne dil ko

rubaru us ke to aina dalan jate hain

jazb tera hi agar khinche to pahunchen warna

tujh ko sunte hain pare wan se jahan jate hain

ah karta hai kharash un ka dilon mein nala

kaun ye qafila mein nala zanan jate hain

ji mein hai kahiye ghazal aur muqabil us ke

guhar is bahr mein mazmun ke rawan jate hain

tujh ko bedar rakha pichhe giran bari ne

rah ro jo hain subuk sar dawan jate hain