جاتا رہا قلب سے ساری خدائی کا عشق

جاتا رہا قلب سے ساری خدائی کا عشق

قابل تعریف ہے تیرے فدائی کا عشق

کیسی مصیبت ہے یہ گل کو خموشی کا شوق

بلبل بیتاب کو ہرزہ سرائی کا عشق

پڑ گئی بکنے کی لت ورنہ یہاں تک نہ تھا

واعظ نافہم کو ہرزہ سرائی کا عشق

کرتا ہوں جو بار بار بوسۂ رخ کا سوال

حسن کے صدقے سے ہے مجھ کو گدائی کا عشق

تم کو خدا نے دیا ساری خدائی کا حسن

مجھ کو عطا کر دیا ساری خدائی کا عشق

عاشق و معشوق کی ہائے نبھے کس طرح

ان کو کدورت کا شوق مجھ کو صفائی کا عشق

پوچھ لے پرویںؔ سے یا قیس سے دریافت کر

شہر میں مشہور ہے تیرے فدائی کا عشق

jata raha qalb se sari khudai ka ishq

qabil-e-taarif hai tere fidai ka ishq

kaisi musibat hai ye gul ko khamoshi ka shauq

bulbul-e-betab ko harza sarai ka ishq

par gai bikne ki lat warna yahan tak na tha

waiz-e-nafahm ko harza sarai ka ishq

karta hun jo bar bar bosa-e-rukh ka sawal

husn ke sadqe se hai mujh ko gadai ka ishq

tum ko khuda ne diya sari khudai ka husn

mujh ko ata kar diya sari khudai ka ishq

ashiq-o-maashuq ki hae nibhe kis tarah

un ko kudurat ka shauq mujh ko safai ka ishq

puchh le parwin se ya qais se daryaft kar

shahr mein mashhur hai tere fidai ka ishq